पोखरा – श्रीमतीलाई बोक्सी आरोप लगाएर कुटपिट गर्ने कास्कीका एक व्यक्ति जेल चलान भएका छन् ।
कास्कीको अन्नपूर्ण गाउँपालिका–१ ढिकुरपोखरीका सन्तोष परियारलाई जिल्ला अदालत कास्कीले श्रीमतीलाई बोक्सी आरोप लगाई कुटपिट गरेकामा ६ महिना जेल सजाय र पाँच हजार रुपैयाँ जरिवानाको फैसला सुनाएको हो ।
परियारले श्रीमती पूजा परियारमाथि बोक्सीको आरोप लगाएर कुटपिट गरेका थिए । घरको एक सदस्य बिरामी भएपछि झारफुक गर्ने क्रममा पूजाले बोक्सी लगाएको भनेर नाम लिएपछि सन्तोषले श्रीमतीलाई कुटपिट गरेका थिए ।
सो घटनाको बारेमा प्रहरीमा उजुरी परे पछि प्रहरीले सन्तोष र अन्य सदस्यलाई पक्राउ गरी अनुसन्धान गरेको थियो । उक्त अभियोगमा जेठ ९ गते सन्तोष र परिवारका अन्य सदस्यविरुद्ध जिल्ला अदालतमा मुद्दा दायर भएको थियो ।
न्यायाधीश काजीबहादुर राईले बुधबार उक्त फैसला गरेका हुन् । उक्त घटनामा परिवारका अन्य सदस्य राजु परियार, उमा परियार, माया, परियार, र राजकुमारी परियारले सफाइ पाएका छन् ।
भर्खरै
लोकप्रिय
