सुर्खेतमा विप्लवको बन्द, दुई ट्रकमा आगजनी

सुर्खेत – नेत्र विक्रम चन्द नेतृत्वको नेपाल कम्यूनिष्ट पार्टीले सुर्खेतमा शनिबार बन्द गरेको छ । कार्यकर्ता रिहाईको माग राख्दै विप्लवले बिहानैदेखि बन्द गरेको हो । सुर्खेत जिल्लामा विप्लवले बन्द गरेपछि यहाँबाट बाह्य जिल्लाका लागि सवारीसाधनहरु गुड्न सकेका छैनन् ।

बन्दपछि बसपार्कमा अलपत्र परेका यात्रुहरु

बन्दबारे प्रचार–प्रसार नगरेको विप्लवले अवज्ञा गरेको भन्दै सुर्खेतमा दुई वटा मालबाहक ट्रकमा आगजनी गरेको छ । सर्खुेतको बराहताल गाउँपालिकाको वड्डिचौरस्थित र भेरीगंगा नगरपालिका–२ सत्तरीस्थित मालवाहक ट्रकमा आगजनी गरिएको जिल्ला प्रहरी कार्यालयका डिएसपी प्रदीपबहादुर क्षेत्रीले बताए ।

बन्दका कारण सुनसान राजमार्ग

उनका अनुसार नेपालगञ्जदेखि सुर्खेतका लागि चामल ल्याएको ना ६ ख ७३१३ नम्बरको ट्रक सप्तरी र इट्टा लिएर बड्डिचौर पुगेको ना ४ ख १७३२ नम्बरको ट्रकमा आगजनी भएको हो ।