पोखरा-पर्यटक सँग थोरङला पास गएका भरिया अशोक राईको लेक लागेर ज्यान गएको छ ।
छिन्ताङ्ग गाँउपालिका ५ धनकुटाका ३५ वर्षीय राई एक साता अघि ४ जना कोरियन पर्यटक र तीन अन्य सहकर्मीका साथ अन्नपूर्ण सर्किटको थोरङला पास गएका थिए। ५ हजार ४ सय १६ मिटरको उचाइमा रहेको थोरङला पास संसारकै उच्च स्थानमा रहेको पास हो ।
विगत १० वर्ष देखि भरियाको रुपमा काम गर्दै आएका राईलाई लेक लागेको अवस्थामा याकखर्क भन्ने ठाउँमा स्थानीयले भेटका थिए । राईका सहकर्मीले उनको अवस्थाका बारेमा खबर नै नगरी एक्लै छोडेर गएकाले उनको ज्यान गएको स्थानियले अनुमान गरेका छन् ।
सोमबार बेलुका ६ बजे तिर स्थानियले उनलाई देखेपछि उद्धार गरी होटलमा लगेका थिए । उनीहरुले राईको अवस्थाका बारेमा उनकी श्रीमतीलाई जानकारी गराएका थिए। राईकि श्रीमतीले ट्रेकिङ्ग एजेन्सि अफ एशोसियशन (टान) को पश्चिमाञ्चल कार्यालयमा जानकारी गराएकी थिइन्।
सोमबार अबेर घटनाको जानकारी पाएका टान महासचिव सुशिल राज पौडेल र सदस्य रामचन्द्र अधिकारी राईको उद्धारका लागि मंगलबार बिहान याकखर्क पुगेका थिए।
राईलाई हेलिकप्टरबाट पश्चिमाञ्चल हस्पिटल पोखरा ल्याइपुर्याउँदा डाक्टरले उनलाई मृत घोषणा गरेको पौडेलले जानकारी दिए ।
राईकि श्रीमती सन्जु राईले उनको मृत्युको बिषयमा छानबिनको माग गर्दै प्रहरीमा उजुरी दर्ता गराएकी छन्।
‘एक मजदुर सहकर्मी अस्वस्थ भएको अवस्थामा किन अन्य सहकर्मीले छाडे, यस बारेमा किन समयमै जानकारी गराइएन’ आफुहरुले पनि बुझ्ने टानका महासचिव पौडेलले बताए।
राईको शबलाई अस्पतालको शब गृहमा राखिएको छ।
पौडेलले पर्यटन मजदुरको विमा बापतको १० लाख रुपैयाँ परिवार उपलब्ध गराउने पहल गर्ने बताए ।
राईका ८ वर्षिय १ छोरा र श्रीमती रहेका छन् ।
भर्खरै
लोकप्रिय
