काठमाडौँ– सोमबार स्वास्थ्य तथा जनसंख्या मन्त्रालयले पत्रकार सम्मेलन गर्दै नेपालमा थप एक जनामा कोरोना भाइरस संक्रमण भएको पुष्टि गरेको छ। भाइरसको संक्रमित हुने १९ वर्षीया युवती हुन्। उनी फ्रान्सबाट कतार हुँदै नेपाल आइपुगेकी थिइन्।
कतारको दोहाबाट काठमाडौँका लागि कतार एयरलाइन्समार्फत चैत ४ गते उनी त्रिभुवन विमानस्थल आइपुगेकी थिइन्। विमानस्थलमा उनको ज्वरो नाप गरियो। तर त्यो समयमा उनको तापक्रम १००.४ फरेन्हाइट भन्दा कम भएका कारण विमानस्थलबाट उनी सिधै घर पुगिन्।
संक्रमित देशबाट फर्किएका कारण साबधानी अपनाउन उनी घर फर्केलगत्तै ‘होम क्वारेन्टाइन’मा बसिन्।
युवतीले आफू संक्रमित भएको थाहा पाउन्जेलसम्म उनी नेपाल आएको ६ दिन भइसकेको छ। यो ६ दिनको अवधिमा उनले क–कसलाई भेटिन् भन्ने पहिचान भने भइसकेको छैन। स्वास्थ्य तथा जनसंख्यामन्त्री भानुभक्त ढकालले युवतीको सम्पर्कमा आएका सबैको पहिचान गर्न सुरु गरेको बताएका छन्। सोमबार मन्त्रालयले चार जना स्वास्थ्य अधिकारीको टोलीलाई युवतीको घरमा खटाई उनको सम्पर्कमा आएका आफन्त, साथी, छिमेकीका बारेमा जानकारी लिन थालेको छ।
टेकुस्थित शुक्रराज ट्रपिकल तथा सरुवारोग अस्पतालका निर्देशक डा. सागरराज भण्डारीका अनुसार संक्रमित युवतीमा अहिले कोरोना भाइरसका लक्षण देखिएका छैनन्।
संक्रमणको जोखिम उनका अभिभावक, आफन्त, साथीभाइ, छिमेकी मात्र नभएर उनीले यात्रा गरको विमानमा रहेका व्यक्ति, विमास्थलमा आवागमनमा उनीसँग ठोक्किएका व्यक्तिसम्म पुगेको छ। उनी चढेको जहाजको सिट क्षमता ३ सय जनाको भए पनि त्यस दिन विमानमा २ सय ५ जना यात्रु थिए।
उनीसँगै यात्रा गरेका २ सय ५ जना व्यक्तिको पहिचान गरी नमूना परीक्षण गर्नुका साथै सबैलाई क्वारेन्टाइनमा राख्न जरुरी छ। उनीहरुको पहिचान गर्ने काम सुरु गर्नुका साथै उनीहरु सबैलाई क्वारेन्टाइनमा राख्नका लागि तयारी गरिएको मन्त्री ढकालले बताए।
विश्व स्वास्थ्य संगठनले कोरोना भाइरसको संक्रमण हावामा नफैलिने बताउँदै आइरहेको छ। त्यस्तै जथाभावी हात नमिलाउन, बेला–बेला सबुन पानीले हात धुन वा सेनिटाइजर प्रयोग गर्न, खोक्दा वा हाछ्यूँ गर्दा कुइनोले छेक्न, सोसल डिस्ट्यान्सिङ मेन्टेन गर्न सबैलाई सुझाब दिइरहेका छन्। साबधानी अपाउँदा कोरोना भाइरसको संक्रमणबाट बच्न सकिने चिकित्सकले बताएका छन्।
यो पनि पढ्नुहोस्
भर्खरै
लोकप्रिय
