झापा- शुक्रबार साँझसम्ममा १ सय २६ जना कोरोना भाइरसको सङ्क्रमण पुष्टि भएको कचनकवल गाउँपालिकाले बिस्तारै महामारीबाट पार पाउँदैछ।
शक्रबारसम्ममा कचनकवल गाउँपालिकाका ८५ जना सङ्क्रमित कोरोना भाइरसको सङ्क्रमण निको भएर घर फर्किसकेका छन्।
अब उक्त गाउँपालिकाको ४१ वटा एक्टिभ केस रहेका छन्। ती सङ्क्रमित अहिले उपचारका क्रममा छन्।
एकै पटक धेरै क्वारेन्टिनमा बसेका स्थानीयबासीमा सङ्क्रमण पुष्टि भएपछि आत्तिएका उक्त गाउँपालिकाका जनप्रतिनिधि अहिले केही सहज महसुस गर्न थालेका छन्।
गाउँपालिकाका अध्यक्ष अन्जरा आलमका अनुसार क्वारेन्टिनमा बसेकाहरूको तीन पटकसम्म नेगेटिभ रिपोर्ट आएपछि मात्र उनीहरूलाई होम क्वारेन्टिनमा बस्न अनुमति दिइएको छ।
आलमले भने, ‘अरू काम थाँती राखेर भए पनि स्थानीयबासीको स्वास्थ्यमा हाम्रो पूर्ण ध्यान गएको छ। स्थानीयबासी नै रहेनन् भने विकास कस्का लागि गर्नु र।’
झापामा अहिलेसम्म १ सय ६९ जनामा कोरोना भाइरसको सङ्क्रमण पुष्टि भइसकेको छ। जस्मा ९५ जना निको भएर अस्पतालबाट डिस्चार्ज भएका छन्। जिल्ला भर हाल ७४ वटा एक्टिभ रहेका छन्।
पहिलो पटक गत बैशाख ११ गते दमक नगरपालिका–३ का ४६ वर्षीय पुरूषमा सङ्क्रमण पुष्टि भएको थियो।
जेठ ३० सम्ममा जिल्लाका १३ वटा स्थानीय तहका एक महिलासहित एक सय ६९ जनामा कोरोना भाइरसको सङ्क्रमण पुष्टि भएको छ।
उमेर समूहका आधारमा पुष्टि हुनेमा १५ वर्षदेखि ६७ वर्षसम्मका रहेका स्वास्थ्य कार्यालय झापाका महामारी रोग कार्यक्रमका फोकल पर्सन समेत रहेका जीवन चौलागाईँले जानकारी दिए।
झापामा अहिलेसम्म जति संक्रमित फेला परे सबै भारतसहित अन्य देशबाट आएका मात्र छन्।
भर्खरै
लोकप्रिय
