झापा– नचिनेको मान्छेलाई साइकलमा लिफ्ट दिँदा झापा अर्जुनधारा ४ का एक व्यक्तिबाट डेढ लाख रुपैयाँ लुटिएको छ।
बैंकबाट पैसा निकालेर निस्केका साइकलमा सवार अर्जुनधारा ४ का आइत सुब्बालाई एक व्यक्तिले लिफ्ट मागेका थिए।
व्यवहारले सोझा आइत सुब्बाले ती व्यक्तिलाई लिफ्ट दिएपछि उनको डेढ लाख रुपैयाँ लुटिएको इलाका प्रहरी कार्यालय अनारमनी विर्तामोडका प्रमुख प्रहरी नायव उपरीक्षक मुकुन्द रिजालले जानकारी दिए।
लिफ्ट मागेर पैसा लुट्ने दुई जना व्यक्तिलाई प्रहरीले पक्राउ गरेर शनिबार सार्वजनिक गरेको छ।
प्रहरीले अर्जुनधारा– ११ का २४ वर्षीय मन्त चेम्जोङ र ३१ वर्षीय मनकुमार बुढाथोकीलाई पक्राउ गरेको हो।
गत जेठ २८ गते अर्जुनधारा –४ का सुब्बा ग्लोवल बैंकबाट पैसा झिकेर घर जाँदै गर्दा उनीसँग एकजना पुरुषले लिफ्ट मागेका थिए।
लिफ्ट मागेपछि सहयोग गरेका आइतले पैसाको ब्याग उनैलाई बोक्न दिएका थिए।
डिएसपी रिजालले सुब्बालाई अभियुक्तहरुले केहि दिनदेखि निगरानी गरिरहेको अनुसन्धानबाट खुलेको जानकारी दिए।
बीच बाटोमा पुगेपछि साइकल रोक्न लगाई चिसो खाने बहानामा पीडितकै मोवाइल फोन मागेर साथी बोलाएर मोटरसाइकलमा पैसा लिएर भागेको प्रहरीको भनाई छ।
सुब्बाको उजुरीको आधारमा प्रहरीले चेम्जोङलाई बिर्तामोड–६ बुट्टाबारीबाट मोटरसाइकलसहित र बुढाथोकीलाई बिर्तामोड –१० तेलपानीबाट नगदसहित पक्राउ गरेको डिएसपी रिजालले जानकारी दिए।
उनीहरुको साथबाट एक थान पल्सर बाइक, ९० हजार नगद, दुई थान मोवाइल फोन र एउटा सिम बरामद गरिएको रिजालले बताए।
भर्खरै
लोकप्रिय
