झापा- भ्यु टावरलगायत अहिलेका लागि अनावश्यक भौतिक पूर्वाधार निर्माणका लागि जति पनि पैसा पठाउने प्रधानमन्त्री केपी शर्मा ओलीले कोरोना भाइरसको महामारीका लागि गृह जिल्ला झापामा पैसा नपठाउनु बिडम्बना भएको नेपाली कांग्रेसका प्रवक्ता विश्वप्रकाश शर्माले बताएका छन्।
प्रधानमन्त्री स्वयंको गृह जिल्ला झापामा कोरोना भाइरसका सङ्क्रमितको संख्या बढ्दै जानु र जिल्ला उनीहरूको उपचारका लागि व्यवस्था नगरिनु दुःखद भएको प्रवक्ता शर्माले बताए।
नेपाली कांग्रेस केन्द्रीय समितिको निर्देशन बमोजिम देशब्यापी कार्यक्रम तथा नेपाली कांग्रेस झापाको जेठ ३२ गतेको निर्णयानुसार कोरोना संक्रमणबाट उत्पन्न असहज परिस्थितिमा जनताको जिउधन र स्वास्थ्य सुरक्षा लगायतका माग राखी झापाका प्रमुख जिल्ला अधिकारी उदयवहादुर रानामार्फत प्रधानमन्त्री केपी शर्मा ओलीलाई ज्ञापन पत्र पठाइएको कार्यक्रममा प्रवक्ता शर्माले त्यस्तो बताएका हुन्।
नेपाली कांग्रेस प्रवक्ता शर्माको अगुवाईमा, काँग्रेसका केन्द्रीय सदस्यहरू, काँग्रेस झापाका सभापति उद्धब थापासहित कांग्रेसका नेता कार्यकर्ताको टोली मंगलबार जिल्ला प्रशासन कार्यालय झापा पुगेको थियो।
सोही क्रममा शर्माले संकटका बेला देश र जनताको सेवक बन्नु पर्ने सरकारका जिम्मेवार मन्त्रीहरू भ्रष्टाचार र अनियमिततामा लागेकाले काँग्रेस राष्ट्रव्यापी विरोधमा उत्रनु परेको बताए।
संकटको सामना गर्न सरकारलाई काँग्रेसले शालीनता पूर्वक गरेको सहयोगलाई दुरूपयोग गर्दै सरकारी निकाय भ्रष्टाचार र लुटतन्त्र मच्चाउन व्यस्त भएपछि काँग्रेस देशव्यापी विरोधमा ओर्लनु परेको भन्दै प्रवक्ता शर्माले सपना बाँडेर मात्र रोग र भोकबाट बाँच्न नसकिने बताए।
भर्खरै
लोकप्रिय
