वीरगञ्ज – नेपाल कम्युनिष्ट पार्टी (नेकपा) का पर्सा जिल्ला सदस्य मुकेश चौरसियाको हत्यामा संलग्न भएको आरोपमा प्रहरीले एकजनालाई पक्राउ गरेको छ ।
प्रहरीले चौरसियाको हत्यामा संलग्न भएको आरोपमा पर्सा बिन्दवासिनी गाउँपालिका–४ मधवल का ३२ वर्षे उत्तम भनिने निरञ्जन तिवारीलाई पक्राउ गरेको हो । तिवारीलाई वीरगञ्ज–१६ इनर्वाबाट पक्राउ गरेको पर्साकी प्रहरी उपरीक्षक गंगा पन्तले जानकारी दिइन् ।
तिवारीलाई हिरासतमा राखी थप अनुसन्धान भइरहेको पन्तले बताइन् । कात्तिक ६ गते बिन्दवासिनी गाउँपालिका ५ मा आयोजित नेकपा बिन्दवासिनी गाउँपालिका कमिटिको शपथ ग्रहण कार्यक्रमस्थल बाहिर दुई पक्षबिच भएको विवादमा झडप हुँदा चौरसिया गम्भीर घाइते भएका थिए ।
उनको कात्तिक ७ गते वीरगञ्जमा उपचारको क्रममा निधन भएको थियो ।
चौरसियाको हत्यामा संलगन रहेको आरोपमा ८ दिनपछि जिल्ला सरकारी वकिलको कार्यालयमार्फत तत्कालीन संविधानसभा सदस्य राजकुमार गुप्तासहित १२ जना विरुद्ध गएको बिहीबार कर्तव्य ज्यान मुद्दा दर्ता भएको थियो ।
१२ जना मध्ये हालसम्म प्रहरीले तिवारीसहित देवा सहनी, हनिफ मिया र सोकदिन गद्दी गरी चारजनालाई मात्रै पक्राउ गरेको छ । अरु ८ जना भने फरार छन् । सहनी, मिया र गद्दीलाई घटना भएकै दिन प्रहरीले पक्राउ गरेको थियो ।
भर्खरै
लोकप्रिय
