बुटवल- रुपन्देही प्रहरीले मर्चवारमा आगो लगाइ हत्या भएको घटनामा संलग्न भएको अभियोगमा ६ जनालाई पक्राउ गरेको छ।
यही माघ ६ गते मायादेवी गाउँपालिका–७ गैरगट्टी दानव नदी नजिकै हत्या गरिएका ३४ वर्षीय राजेन्द्र यादवको हत्यामा संलग्न ८ जनामध्ये आरोपित ६ जना योजनाकार र परिवारका सदस्यहरुलाई पक्राउ गरेको हो।
यादवका भाइ, काका र काकाको सम्धीले सम्पत्तिका लागि हत्या गरेको प्रहरी अनुसन्धानबाट पुष्टि भएको जिल्ला प्रहरी कार्यालय रुपन्देहीका प्रमुख प्रहरी उपरीक्षक प्रविण पोखरेलले बताए।
एक हप्ताअघि भएको घटनामा संलग्न अभियुक्तमध्ये मुख्य योजनाकार सियारी २ बस्ने रामबेलाश यादव, बुद्धिराम कोहार, मृतकको भाइ विरेन्द्र यादव, काकाको सम्धी सन्त कुमार यादव, हत्याका सहयोगी सिद्धार्थनगर ११ का राकेश यादव र अफताव मुसलमानलाई पक्राउ गरी नियन्त्रणमा लिएको प्रहरी उपरिक्षक पोखरेलले बताए।
अपराधमा संलग्न मध्यस्तकर्ता लङगारे भन्ने ईन्द्रजित यादव र सोनु मुराउ फरार रहेका छन्।
यादवका काकाले मान्छे मार्ने मध्यस्तकर्तालाई पच्चीस लाख वा १ कठ्ठा जग्गा दिने शर्तमा हत्या गराएको प्रहरी अनुसन्धानमा खुलेको उनले बताए। घटनाका मुख्य योजनाकार बुद्धिराम कोहारले नगद २० हजार र ५० हजार गरी दुई पटकमा ७० हजार मृतकको काकाबाट लगेका थिए।
भर्खरै
लोकप्रिय
