सुर्खेत- ज्ञानबहादुर नेपाल, तिलक गन्धर्व र देवराज गिरीको मौलिक प्रस्तुतसँगै कर्णाली उत्सवको दोस्रो संस्करण कर्णाली प्रदेशको राजधानी सुर्खेतको वीरेन्द्रनगर नगरपालिकाको बुलबुले उद्यान परिसरमा बुधबार सुरु भएको छ।
संस्करणको उद्घाटन सत्रमा कर्णाली चिनाउने योगी नरहरिनाथबारे विद्वत प्रवचन प्राध्यापक डा. जगतप्रसाद उपाध्यायले दिएका छन्, जो नेपाल प्रज्ञा प्रतिष्ठानका सदस्यसचिव हुन्।
यस्तै उद्घाटन सत्रमा वीरेन्द्रनगर नगरपालिकाका प्रमुख देवकुमार सुवेदीले वीरेन्द्रनगरको वैभवबारे प्रस्तुती दिएका छन्। ‘कर्णाली, पिपुल एण्ड प्लेसेस’ पुस्तकको विमोचनमा सामल मुख्यमन्त्री शाहीले कर्णालीको विकासमा देखापरेको चुनौती र त्यसको हलमा यस्ता उत्सवको भूमिका हुनेमा जोड दिएका छन्।
सत्रमा उनले फोटो प्रदर्शनीको अनावरणसमेत गरेका थिए। सत्रमा देउडा गीतको प्रस्तुतिका साथै ‘मरीलानु के छ साँचेर नाच बरु मारुनी कम्मर भाँचेर’ शीर्षकको गीतमा मौलिक नृत्य पनि प्रस्तुत गरिएको छ।
नीति निर्माणमा सार्वजनिक बहसको महत्वबारेमा कर्णाली प्रदेश योजना आयोगका उपाध्यक्ष डा. सर्वराज खड्काले बोलेका थिए। भोलिदेखि विभिन्न १६ शीर्षकका बहसहरु सुरु हुँदैछन्।
यो पनि पढ्नुहोस्
भर्खरै
लोकप्रिय
