काठमाडौँ- नेकपा माओवादी केन्द्रको केन्द्रीय कमिटी बैठक पहिलो दिन पार्टीको नाम परिवर्तन र एमालेतिर गएका नेताहरुलाई कारवाही गर्ने मामिलामा निर्णय लिन असफल भएको छ।
पार्टी केन्द्रीय कार्यालय पेरिस डाँडामा आइतबार बसेको बैठकमा प्रदेशका इन्चार्जले आ–आफ्नो क्षेत्रको रिपोर्ट प्रस्तुत गर्नुबाहेक अन्य विषयमा ठोस निर्णय नभएको हो।
आइतबारको बैठकको एजेण्डाकै रुपमा प्रस्तुत गरिएको पार्टीको नाम परिवर्तन गर्ने मामिलामा केही सदस्यहरुले यसमा हतार गर्न नहुने सुझाव पेश गरेका थिए।
बैठकमा सहभागी एक केन्द्रीय सदस्यले भने, ‘पार्टीको नाम परिवर्तन गर्ने प्रस्ताव माथिल्लो तहबाट आएको छ। प्रस्ताव अनुमोदन होला जस्तो छैन। केही साथीहरुले अहिले हतारमा पार्टीको नाम परिवर्तन गर्न नहुने सुझाव दिएका छन्। मेरो पनि सुझाव त्यही नै हो।’
ती सदस्यका अनुसार सोमबार बस्ने बैठकमा पनि यसबारे छलफल हुनेछ।
माओवादी केन्द्रको शनिबारको बैठकले एमालेतिर गएका गृहमन्त्री रामबहादुर थापासहितका नेताहरुलाई आफ्नो धारणा स्पष्ट पार्न २४ घण्टे अल्टिमेटम दिएको थियो।
भर्खरै
लोकप्रिय
