काठमाडौं – नबिल बैंकले युनाइटेड फाइनान्सलाई एक्विजेसन (प्राप्ति) गर्ने भएको छ।
नबिल बैंकले युनाइटेड फाइनान्सलाई प्राप्ति गर्ने विषयमा शुक्रबार सम्झौता गरेको हो।
बैंकका मर्जर कमिटीका संयोजक उदयकृष्ण उपाध्याय र फाइनान्सका मर्जर कमिटीका संयोजक मनीषकुमार खेमकाले प्राप्तिका लागि सम्झौता पत्रमा हस्ताक्षर गरेका हुन्।
नबिलले युनाइटेडलाई ३५ स्वाप रेसियोमा प्राप्ति गर्न लागेको हो।
प्राप्तिपछि युनाइटेड फाइनान्सको सम्पूर्ण कारोबार नबिलकै नाममा हुने र सञ्चालक समिति पनि नबिल बैंककै रहने गरी सम्झौता भएको छ।
उक्त सम्झौतापश्चात् प्राप्तिका लागि नेपाल राष्ट्र बैंकमा स्वीकृतिका लागि प्रक्रिया अगाडि बढाइनेछ र समयमै स्वीकृति पाएमा यथाशीघ्र संयुक्त कारोवार नबिल बैंकले गर्नेछ।
सोहीअनुसार नबिल बैंकको शाखा सञ्जाल वृद्धि भई १४७ हुनेछ।
नबिल बैंकको काठमाडौं उपत्यकाभित्र मात्र शाखा सञ्जाल वृद्धि भई ३७ हुनेछ । एटीएम संख्या भने १९० हुनेछ। चैत मसान्तको वित्तीय विवरणअनुसार निक्षेपको अंक २१६ अर्ब हुनेछ भने कर्जाको अंक २०१ अर्ब हुनेछ । यसले गर्दा नबिल बैंकको कर्जा एवं निक्षेप दुबैको अंक २ खर्बभन्दा माथि हुनेछ।
नबिल बैंकले मर्जर तथा प्राप्ति प्रक्रियामा जान पहिलो पटक यस वर्षको साधारणसभाबाट पारित गरेको थियो र सोही वर्ष नै प्राप्ति सम्झौताको घोषणा पनि गरेको छ।
यो प्राप्तिसँगै नबिल बैंकले बजारमा आफ्नो नवीन सेवा र थप शाखा सञ्जालमार्फत नयाँ रणनीतिअनुसार बजारमा उपस्थित हुनेछ।
भर्खरै
लोकप्रिय
