काठमाडौँ – ज्योति विकास बैंक र नेपाल रेस्टुरेन्ट तथा बार एसोसिएसन नेपाल (रेबान) बीच सहकार्यका लागि सम्झौता भएको छ।
रेबानमा आबद्ध व्यवसायी र त्यस्ता संस्थामा कार्यरत कर्मचारीलाई विभिन्न बैंकिङ सेवा प्रदान गराउने सम्बन्धमा दुई पक्षबीच सम्झौता भएको हो।
उक्त सम्झौतापत्रमा बैंकका तर्फबाट बैंकका नायब प्रमुख कार्यकारी अधिकृत पारसराज कँडेल र नेपाल रेस्टुरेन्ट तथा बार एसोसिएसन नेपालका तर्फबाट रेबानका अध्यक्ष अरनिको राजभण्डारीले हस्ताक्षर गरेका हुन्।
सम्झौताअनुसार बैंकले रेबानमा आबद्ध व्यवसायी तथा त्यस्ता संस्थामा कार्यरत कर्मचारीलाई विशेष छुटमा प्रोफेसनल लोन र १५ लाख रुपैयाँसम्मको बिना धितो सहुलियतपूर्ण कर्जा प्रदान गर्नेछ।
सम्झौतापश्चात् ज्योति विकास बैंकले रेबानमा आबद्ध व्यवसायी र त्यस्ता संस्थामा कार्यरत कर्मचारीलाई सहज वित्तीय सेवा प्रदान गर्नुका साथै रेबानअन्तर्गतका व्यवसायीलाई डिजिटल बैंकिङ सेवा प्रदान गर्ने र सहजै सुचारु गरी व्यवसायमा लागू गर्न पनि सहयोग गर्नेछ।
व्यवसायीले डिजिटल भुक्तानीका सेवा व्यवसायमा भित्र्याई ग्राहकलाई थप सुविधा उपलब्ध गराउन सक्नेछन्।
यसका साथै बैंकले आधुनिक बैंकिङ, वित्तीय साक्षरता, उद्यमशीलता विकासका निमित्त रेबानसँगको सहकार्यमा विभिन्न कार्यक्रम सञ्चालनमा ल्याउने भएको छ।
बैंकले हाल १०५ शाखा कार्यालय, १ एक्सटेन्सन काउन्टर तथा ६१ वटा एटीएममार्फत सेवा उपलब्ध गराउँदै आएको छ।
भर्खरै
लोकप्रिय
