काठमाडौँ – राष्ट्रिय सभा सदस्य डा विमला राई पौड्यालले संक्रमणकालीन न्यायलाई छिट्टै टुंग्याउन माग गरेकी छन्। उनले राष्ट्रिय सभा बैठकमा शुक्रबार संक्रमणकालीन न्यायलाई टुंगो लगाउनुपर्ने बताएकी हुन्।
बृहत् शान्ति सम्झौता भएको र नयाँ संविधान बनेको लामो समय भइसक्दा पनि द्वन्द्वपीडितले न्याय नपाएको र पीडकको पहिचानसम्म हुन नसकेको भन्दै उनले राजनीतिक दलले गरेको प्रतिबद्धता पूरा गर्न नसकेको आरोप लगाइन्।
उनले संक्रमणकालीन न्याय नटुंगिए शान्ति प्रक्रिया नै पूरा नहुने भएकाले आगामी चुनावसम्म संक्रमणकालीन न्यायलाई टुंग्याउन माग गरेकी छन्।
उनले भनिन्, ‘जबसम्म संक्रमणकालीन न्यायको मुद्दा टुंगिँदैन, तबसम्म शान्ति प्रक्रिया हाम्रो टुंगिएको मानिँदैन। र, हामीले विश्वसामु गौरव गर्ने ठाउँ पनि रहँदैन।’
उनले यदि कानुनमा केही कमी भए संशोधन गर्न लिएर आउनसमेत आग्रह गरिन्। उनले भनिन्, ‘अर्को चुनावमा जानुभन्दा अगाडि संक्रमणकालीन न्यायको मुद्दा टुंगियोस्, यसका लागि सरकारलाई विनम्रतापूर्वक अनुरोध गर्न चाहन्छु।’
उनले बृहत् शान्ति–सम्झौतापछि द्वन्द्वरत पक्ष नै पटक–पटक सरकार सञ्चालनमा पुगे पनि यस विषयलाई टुंगोमा पु¥याउन नसकेको बताइन्। राजनीतिक दलले चाहेमा तुरुन्तै गर्न सकिने उनको भनाइ छ।
भर्खरै
लोकप्रिय
