काठमाडौँ- निर्दोष व्यक्तिलाई लागु औषध राखेर फसाउन खोजेको प्रकरणमा मुछिएका रौतहटका प्रहरी प्रमुख सिद्धिविक्रम शाहले जिल्ला छाडेका छन्। बुधबार बिहान उनी काठमाडाैँतर्फ लागेका हुन्।
उनलाई प्रहरी प्रधान कार्यालयले हेडक्वार्टर तानेको छ। घटनाको छानबिन गर्न एसएसपी कृष्ण महतको संयोजकत्वमा चार सदस्यीय समिती गठन गरेर शाहलाई जिल्ला प्रमुखको जिम्मेवारीबाट मुक्त गरिएको हो।
रौतहटको नयाँ प्रहरी प्रमुखमा कसलाई पठाउने भन्नेबारे निर्णय भइनसकेको प्रहरी हेडक्वार्टर स्रोतले जानकारी दिएको छ।
यस प्रकरणमा दुई जना प्रहरी निलम्बित भइसकेका छन्। रौतहटका पत्रकार मोहम्मद मोजिबुल्लाहलाई प्रहरीले नै लागु औषध राखेर समातेको थियो।
तर सिसिटिभि फुटेजमा उक्त कुरा खुलेपछि प्रहरीले दुई दिनअघि मोजिबुल्लाहसहित दुई जनालाई छाडेको थियो।
घटनामा संलग्नता रहेको दाबी गरिएका रौतहटकै अर्का पत्रकार सन्जय सहनीले एसपी शाहसँगको टेलिफोन सम्वादको क्लिप बाहिर ल्याएपछि जिल्ला प्रहरी प्रमुखको भूमिकासमेत शंकास्पद देखिएको हो।
भर्खरै
लोकप्रिय
