काठमाडौँ – सञ्चार तथा सूचना प्रविधिमन्त्री ज्ञानेन्द्रबहादुर कार्कीले केपी ओली नेतृत्वको अघिल्लो सरकारले गफ मात्र छाँटेर समय व्यतित गरेको आरोप लगाएका छन्।
सरकारका प्रवक्ता समेत रहेका मन्त्री कार्कीले विगतको सरकारले के गर्यो र गरेनभन्दा पनि वर्तमान सरकारले के गर्दै छ भन्ने कुरा महत्वपूर्ण हुने बताए।
ओली सरकारले साढे तीन वर्ष गफमा बिताएको बताएकाका कार्कीले कांग्रेसको सरकार मुलुकको समृद्धि र विकासमा केन्द्रित रहेको बताए।
शनिबार सुनसरीको इनरुवामा आयोजित एक कार्यक्रममा उनले केन्द्रमा बनेको गठबन्धनको सहमतिबमोजिम वर्तमान सरकार अघि बढेको बताए।
यसैबीच, मन्त्री कार्कीले प्रदेश १ का आफ्ना पार्टी कांग्रेसका प्रदेश सांसदलाई पार्टी निर्णयविपरीत नजान निर्देशन दिएका छन्। मन्त्री कार्कीले प्रदेश सभामा कांग्रेसबाट प्रतिनिधित्व गर्ने सांसदलाई पार्टी निर्णयको अक्षरशः पालना गर्न निर्देशन दिए।
मन्त्री कार्कीले प्रदेश एक सरकारको प्रतिनिधित्वको विषयलाई लिएर केही कांग्रेस नेता तथा कार्यकर्ता ट्र्याकबाहिर जान खोजेको बुझिन आएको भन्दै त्यसो गरिए पार्टी हितविपरीत ठहरिने बताए।
प्रदेश १ को सरकार नेकपा एसको नेतृत्वमा बन्ने बताएका मन्त्री कार्कीले गठबन्धनको निर्णयबमोजिम मुख्यमन्त्री चयन हुने बताए। कार्कीले कांग्रेस गठबन्धनको निर्णयबमोजिम अघि बढ्ने भएकाले केही दिनभित्रै प्रदेश १ मा राजेन्द्र राईको नेतृत्वमै सरकार बन्ने बताए।
भर्खरै
लोकप्रिय
