काठमाडौँ – आसन्स सहिद स्मारक ए डिभिजन लिगको संकटा क्लब र यु क्यानबीच स्पोर्ट्स किट्स प्रायोजनसम्बन्धी शुक्रबार सम्झौता भएको छ।
सहिद स्मारक ए डिभिजन क्लब संकटाले शुक्रबार एक कार्यक्रम आयोजना गरी यु क्यानसँग सम्झौतापत्रमा हस्ताक्षर गरेको हो।
यु क्यानका प्रमुख कार्यकारी निर्देशक राजेन्द्र महर्जन र क्लबका वरिष्ठ उपाध्यक्ष सुरेन्द्र शिख्राकारबीच सम्झौता भएको हो।
यससँगै यु क्यानले क्लबलाई १० लाख रुपैयाँ बराबरको स्पोट्स किट्स प्रदान गर्नेछ।
यु क्यानका प्रमुख कार्यकारी अधिकृत राजेन्द्र महर्जनले फुटबलप्रतिको लगावकै कारण क्लबलाई प्रयोजन गरेको बताए।
यस्तै, हिमालयन बैंक लिमिटेड संकटाको सह–प्रायोजकको रूपमा जोडिएको संकटालाई बैंकले एक सिजनका लागि १० लाख रुपैयाँ उपलब्ध गराउने क्लबका अध्यक्ष इन्द्रमान तुलाधारले जानकारी दिए।
उनले मुख्य प्रायोजकका लागि छलफल भइरहेको र एक दुई दिनमै छिनोफनो लाग्ने बताए। सोही कार्यक्रममा रवि सिलवालको कप्तानीमा क्लबले २२ सदस्यीय टोली पनि सार्वजनिक गरेको छ। जसमध्ये तीन अफ्रिकन तथा एक भारतीय खेलाडी समावेश छन्।
सहिद स्मारक ए डिभिजन लिग मंसिर ३ गतेबाट आयोजना हुँदै छ जसमा १४ क्लबले लिगमा प्रतिस्पर्धा गर्दै छन्।
नयाँ सिजनको लिग मंसिर ३ गते दशरथ रंगशालामा उद्घाटन हुने तालिका छ। जहाँ यसै सिजन बढुवा भएको सातदोबाटो युथ क्लब र फ्रेन्ड्स क्लबबीच उद्घाटन खेल हुँदै छ।
भर्खरै
लोकप्रिय
