काठमाडौं – निर्वाचन आयोगले शुक्रबारदेखि स्थानीय तहबाट मतदाता नामावली दर्ता सुरु गरेको छ।
आयोगले एक महिना अवधिका लागि फोटोसहितको मतदाता नामावली संकलन र सूचीकरण गर्न थालेको हो। ०७८ सालभित्रै स्थानीय तहको निर्वाचन गर्नुपर्ने अवस्थालाई ध्यानमा राख्दै आयोगले मतदाता नामावली सूचीकरणलाई अगाडि बढाएको हो।
पहिलो चरण तराई, भित्री मधेस, काठमाडौं उपत्यकाका पालिका तथा स्थानीय तहबाट र दोस्रो चरण बाँकी रहेका स्थानीय तहबाट मतदाता नामावली संकलन गर्ने आयोगले जनाएको छ।
भदौदेखि जिल्ला प्रशासन कार्यालय र निर्वाचन कार्यालयबाट मतदाता नामावली संकलन गरिरहेको आयोगले यसपटक स्थानीय तहबाट नामावली संकलन गर्न थालेको हो।
१६ वर्ष पुगेका नागरिकता प्राप्त व्यक्तिले फोटोसहित मतदाता नामावलीमा नाम दर्ता गर्नका लागि व्यक्ति स्वयं उपस्थित भएर मात्र नाम दर्ता गर्न सकिने निर्वाचन आयोगका प्रवक्ता शालिकरामशर्मा पौड्यालले बताए। निर्वाचनमा मतदान गर्न भने १८ वर्ष उमेर हुनुपर्ने कानुनी प्रावधान छ।
सरकारले मतदाता नामावली संकलन प्रयोजनका लागि ५ करोड ६४ लाख रुपैयाँ बजेट आयोगलाई दिएको छ।
नेपालमा हाल १ करोड ६२ लाख ४३ हजार मतदाता कायम छन्। जिल्लास्थित निर्वाचन कार्यालय स्थानीय तहका केन्द्र तथा जिल्ला प्रशासन कार्यालयबाट फोटोसहितको मतदाता नामावली सूचीकृत गर्न सकिने व्यवस्था मिलाइएको आयोगले जनाएको छ।
भर्खरै
लोकप्रिय
