काठमाडौँ – प्रधानमन्त्री केपी शर्मा ओलीले गरिब नभएको देश बनाउनका लागि वातावरण जोगाउनु पर्ने र त्यसका लागि अहिलेको सरकार प्रतिबद्ध रहेको बताएका छन् ।
विश्व वातावरण दिवसको अवसर पारेर सरकारले सुरु गरेको वातावरण महाअभियानको ललितपुरको जावलाखेलमा सुरुवात गर्दै प्रधानमन्त्री ओलीले मंगलबार विकास र समृद्धिको सपना पूरा गर्नका लागि वातावरण बिनास होइन संरक्षण गर्नु पर्ने र त्यसका लागि सरकार प्रतिबद्ध रहेको बताएका छन् ।
वातावरण दिवसको अवसरमा सुरु भएको अभियानको उद्घाटन गर्दै प्रधानमन्त्री ओलीले भने, ‘यो अभियानबाट हामीले वातावरण जोगाउने प्रतिज्ञा गरेका छौँ । गाउँदेखि पूरै देशलाई नमूना बनाउने प्रतिबद्धता हो । हामीसँग सबैथोक छ मात्रै प्रतिबद्धताको खाँचो छ ।’
भौगोलिक रुपमा विविधताले भरिएको देश रहेकाले सम्भावना रहेको उनले बताए । उनले भने, ‘समुद्र सहतहबाट ५८ मिटरदेखि विश्वको सर्वोच्च शिखर यहिँ छ । हिमाल छ अनि हामी पहुँचका हिसाबले समुद्रसँग पनि जोडिएका छौँ ।’
अहिले देखिएको वातावरणीय समस्या जनचेतानको अभाव र असन्तुलित विकासका कारणले भएको उनले बताए । यस्तै लोभी पापी मानवीय बानीका कारण पनि समस्या भएको उनले बताए ।
विश्वव्यापी रुपमा भइरहेको जलवायु परिर्वतमा कार्बन उत्सर्जन धेरै गर्ने विकसित देशको हात रहेको तर समस्या नेपालजस्ता देशले भोग्नु परेको उनले बताए । उनले भने, ‘प्रदुषण आफूले गर्ने अनि आरोप हामीलाई लगाउने ? समुद्र उनीहरुले प्रदुषित पार्ने अनि आरोप हामीलाई लगाउने ?’
वातावरण व्यस्थापनसँगै सुशासन आफ्नो सरकारको एजेण्डा रहेको उनले बताएका छन् । उनले भने, समृद्ध नेपाल र सुखी नेपाली हाम्रो सपना हो । हामी समाजवाद उन्मुख देश बनाउन चाहन्छौँ ।’
भर्खरै
लोकप्रिय
