बुटवल – रुपन्देही प्रहरीले लुम्बिनी क्षेत्रबाट हतियार सहित ३ जनालाई पक्राउ गरेको छ।
आइतबार राती इलाका प्रहरी कार्यालय लुम्बिनी, रुपन्देहीबाट प्रहरी निरीक्षक युवराजजंग कार्कीको कमाण्डमा गस्तीमा खटिएको प्रहरी टोलीले ३ जनालाई पक्राउ गरेको हो।
युपी ५५ एडी ०६८४ नम्बरको मोटर साइकल शंका लागेर खोजी गर्दै जाने क्रममा लुम्बिनी सांस्कृतिक नगरपालिका वडा नम्बर ६ बसपार्क नजिकबाट पक्राउ गरेको हो।
पक्राउ पर्नेमा भारत जिल्ला सिद्धार्थनगर बस्ने ३४ वर्षीय चिनक भनिने मेदि हुसेन, सोही ठाउ बस्ने ५१ वर्षीय अक्बर खान र ५५ वर्षीय आसिक अलि रहेको जिल्ला प्रहरी कार्यालयका प्रहरी निरीक्षक बेद पौडेलले जानकारी दिए।
पक्राउ परेकाहरु मध्येबाट मोटरसाईकल चालक चिनक भनिने मेदि हुसेनको साथबाट एउटा कटुवा पेस्तोल, केएफ ९ एमएम लेखिएको २ राउण्ड गोली र चक्कु १ थान फेला परेको प्रहरीको भनाई छ।
प्रहरीलाई देखेर भाग्ने क्रममा दुर्घटनामा परी तीनै जना घाईते भएकोले उनीहरुलाई उपचारको लागि मेडिकल कलेज भैरहवा पठाइएको र थप अनुसन्धान भइरहेको पौडेलले बताए।
भर्खरै
लोकप्रिय
