‘चिकित्सा शिक्षा अध्यादेश आउँदैन, कांग्रेसले विरोध गर्नुको अर्थ छैन’

काठमाडौँ – चिकित्सा शिक्षा अध्यादेश अब कुनै पनि हालतमा नआउने शिक्षा, विज्ञान तथा प्रविधि मन्त्री गिरिराजमणि पोखरेलले बताएका छन् ।

जुम्लामा अनशनरत डा. गोविन्द केसीलाई काठमाडौँ ल्याउन हेलिकप्टर पठाएको जानकारी दिन बिहीबार बिहान आयोजित पत्रकार सम्मेलनमा मन्त्री पोखरेलले अध्यादेशकै आधारमा सरकारले संसदमा विधेयक लगेकाले अब अध्यादेशको अर्थ नरहेको बताए ।

उनले भने, ‘चिकित्सा शिक्षा अध्यादेश अब आउँदैन । कांग्रेसले अहिले विरोध गर्नुको कुनै अर्थ नै छैन । डा. केसीका अरु मागका बारेमा छलफल गर्न तयार छौँ र उहाँलाई काठमाडौँ ल्याएपछि त्यसमा खुल्ला छलफल हुनेछ ।

उनले माथेमा आयोगको मर्म अनुसार नै चिकित्सा शिक्षा विधेयक आएको दाबी पनि गरे । मन्त्री पोखरेलले भने, ‘संसदमा विधेयक गएको छ, आवश्यक परे त्यहिँ संशोधन हुनेछ ।’ उनले कुनै पनि ऐन बन्नका लागि विधि र प्रक्रिया पूरा गर्नु पर्ने भन्दै कार्यदलको प्रतिवेदन नै ऐन नबन्ने बताए ।

सरकारले जुम्लामा अनशनरत डा. गोविन्द केसीलाई लिन बिहीबार बिहान हेलिकप्टर पठाएको उनले बताए । साथमा स्वास्थ्य विभागका महानिर्देशक डा. गुणराज लोहनीलाई पनि पठाइएको उनले जानकारी दिए ।

डा. केसी अनशनरत कर्णाली स्वाथ्य विज्ञान प्रतिष्ठानले यनको उपचार अब आफूहरुले गर्न सक्ने अवस्थामा नरहेको बताए लगत्तै बुधबार राति बसेको नेकपाको आकश्मिक बैठकले डा. केसीलाई ल्याउने निर्णय गरेको थियो ।

पत्रकार सम्मेलनमा मन्त्री पोखरेलले भने, ‘पहिले डा. केसीलाई बचाउनु पर्छ, सरकार त्यसका लागि प्रतिबद्ध छ । उहाँको स्वभाव कुरा बेग्लै होला तर बचाउनु हाम्रो कर्तव्य हो । जुम्लामा आइसियु छैन र मौसम खराब भएपछि उद्धार गर्न पनि सकिँदैन, त्यसैले आजै पठाएका छौँ ।’

डा. केसी काठमाडौँ आएमा संसदमा दर्ता भएको विधेयकका बारेमा छलफल गर्न सकिने उनले बताए ।

यस्तै मन्त्री पोखरेलले अस्पताल अब आन्दोलन वा अनशन स्थल बन्ने पनि बताए । शिक्षण अस्पतालको सेवा अवरुद्ध हुने अवस्था आउन नदिन अस्पतालका निर्देशकलाई भनेको पनि उनले बताएका छन् । डा. केसीको समर्थनमा डाक्टरहरुले बिहीबारदेखि देशभरका अस्पतालमा आकश्मिक बाहेकका सेवा ठप्प पार्ने गरी आन्दोलन थालेका छन् ।

जुम्लामा डा. केसीलाई रोक्ने तयारी

सरकारले हेलिकप्टर पठाए पनि जुम्लामा उनलाई काठमाडौँ ल्याउन नदिन तयारी भएको छ । सरकारले अपहरणको शैलीमा डा. केसीलाई लैजान लागेको भन्दै कर्णाली स्वास्थ्य विज्ञान प्रतिष्ठानमा डा. केसीका समर्थक जम्मा भएका छन् ।