बुटवल – बुटवलमा जारी २२औँ संस्करणको तिलोत्तमा गोल्डकपको दोस्रो खेलमा थ्री स्टार क्लब विजयी भएको छ।
शनिबारदेखि सुरु भएको गोल्डकपमा हिमालयन शेर्पा क्लबलाई १–० गोल अन्तरले पराजित गर्दे थ्री स्टार विजयी भएको हो। जितसँगै थ्री स्टार सेमिफाइनल प्रवेश गरेको छ।
दोस्रो हाफको ३८ मिनेटमा १८ नम्बर जर्सीका खेलाडी दिपेश गुरुङले गरेको गोल नै निर्णायक बनेको थियो। यसअघि शनिबार भएको खेलमा सुदूरपश्चिम–११ विजयी भएको थियो।
बुटवल उपमहानगरपालिकाको संरक्षकत्व र रूपन्देही जिल्ला फुटबल संघको आयोजनामा एन्फा टेक्निकल सेन्टर देवीनगरमा चलिरहेको तिलोत्तमा गोल्डकपमा दुई विभागीयसहित ८ टिम सहभागी प्रतियोगिताको विजेताले ११ लाख ११ हजार एक सय ११ रुपैयाँ नगद पुरस्कार पाउने छ। उपविजेताले पाँच लाख ५५ हजार ५ सय ५५ रुपैयाँ पुरस्कार प्राप्त गर्नेछ।
सर्वोत्कृष्ट खेलाडीले एक लाख रुपैयाँ वा एक थान मोटरसाइकल पुरस्कार पाउँदा उत्कृष्ट फरवार्ड, गोलरक्षक, मिड फिल्डर, डिफेन्स र कोचले जनही ३० हजारका दरले नगद पुरस्कार प्राप्त गर्ने आयोजक रूपन्देही फुटबल संघका अध्यक्ष लोक पुनले जानकारी दिए।
यस्तै, प्रत्येक खेलमा ‘म्यान अफ द म्याच’लाई पनि ११ हजार १ सय ११ रुपैयाँ पुरस्कार प्रदान गरिने संघका महासचिव हिमाल गौचनले बताए।
भर्खरै
लोकप्रिय
