काठमाडौँ – जनसंख्याको हिसाबले देशकै सबैभन्दा सानो जिल्ला मुस्ताङमा आर्थिक वर्ष ०७४/७५ मा केवल १२ वटा फौजदारी मुद्धा दर्ता भए। जिल्ला प्रहरी कार्यालय,मुस्ताङको तथ्यांक अनुसार गत आर्थिक वर्षमा जिल्लाभर तीनवटा बलात्कार र तीनवटा बलात्कार प्रयासका घटना भए।
लागुऔषध,सवारी ज्यान र गौबधमा एकएक वटा मुद्धा दर्ता भए। तीनवटा मुद्धा सार्वजनिक अपराधका थिए। भवितव्य ज्यानका ११ र आत्महत्याका तीनवटा घटना भए। हिमालपारीका दुई जिल्लामध्येको एक मुस्ताङ भौगोलिकरुपमा विकट मानिन्छ।
मुस्ताङ जिल्लामा किन यति थोरै फौजदारी मुद्धा ? मुस्ताङ के निकै शान्तिपूर्ण हो ? मुस्ताङका जिल्ला प्रहरी प्रमुख डीएसपी महेन्द्र खड्का जनसंख्या थोरै हुनु,भोगोलिकरुपमा विकट हुनु र धेरै विषय स्थानीयस्तरमा मिल्ने हुँदा प्रहरीमा दर्ता हुने मुद्धाको संख्या कम भएको बताउँछन्।
‘ जिल्लामा सडक भर्खरै पुगेको हो। धेरै ठाउँ सडक सन्जालमा जोडिन सकेका छैनन्। गाउँ गाउँमा मुखिया हुने भएकाले सामान्य विवादहरु प्रहरीसम्म आईपुग्दैनन’,डीएसपी खड्का भन्छन्। १२/१३ हजार जनसंख्या भएको मुस्ताङमा मुद्धा दर्ता गर्न जोमसोमस्थित जिल्ला प्रहरी कार्यालयमै आईपुग्नुपर्छ।
प्रहरीका अनुसार गत आर्थिक वर्ष दर्ता भएका फौजदारी मुद्धामा १४ जना पक्राउ परे र ती सबै पुरुष थिए। यी घटनामा कोही पनि फरार छैनन्। आर्थिक वर्ष ०७२/७३ मा २० वटा र ०७३/७४ मा २८ वटा मुद्धा दर्ता भएका थिए। यसमा भवितव्य ज्यान र आत्महत्याका घटना पनि समावेश छन्।
काठमाडौँमा मात्र गत आर्थिक वर्षमा विभिन्न शिर्षकमा गरी ६ हजार ८ सय ४१ मुद्धा दर्ता भएका थिए। यी मुद्धामा ९ हजार एक सय दुईजना पक्राउ परेको र ६ सय ९२ जना फरार रहेको काठमाडौँ प्रहरीले जनाएको छ।
भर्खरै
लोकप्रिय
