गर्मीको मौसम छ। विशेषगरी तराईका क्षेत्रमा यतिबेला सर्पदंश उपचार केन्द्रमा सर्पले टोकेका बिरामीको चाप लाग्ने गर्छ। समयमा उपचार केन्द्रसम्म नआइपुग्दा कतिपयको ज्यान नै जाने गरेको छ।
गर्मी तथा वर्षाको बेलामा जताततै पानी भएको अवस्थामा सर्प प्वालबाट बाहिर निस्किने गर्छन्। मान्छेले सर्पलाई टेक्दा वा सर्पले असुरक्षित महसुस गरे मानिसलाई डस्ने गर्दछ।
तर सर्पले डसेपछि के गर्ने/के नगर्ने भन्ने मानिसलाई अझै पनि अन्योल छ। कतिपयले गर्नै नहुने काम गरेर सर्पदंश उपचार केन्द्रसम्म पुग्छन्। पछि स्वास्थ्यमा थप जटिलता उत्पन्न हुने गर्छ। कतिपयको अंग नै काटेर फाल्नुपर्ने अवस्था आउनसक्ने उपचार खटिएका प्राविधिक बताउँछन्।
कनकाई नगरपालिकामा सञ्चालित कनकाई सहारा सर्पदंश उपचार केन्द्रका प्राविधिक अभिषेक पोखरेलका अनुसार सर्पले टोकेका ठाउँमा रगत सञ्चालन नै बन्द हुनेगरी रबर तथा तारले बाँध्नु हुँदैन। त्यसले रगत सञ्चालन हुन नदिएर बाँधेको अंग नै मर्न जान्छ।
पोखरेल भन्छन्, ‘सर्पले टोकेपछि मान्छे धेरै आत्तिन्छन्। आत्तिनु भएन। सर्पले टोकेको ठाउँमा राम्ररी ब्यान्डेजले बाँध्नुपर्छ।’
उनका अनुसार सर्पले टोकेपछि बिरामीलाई पानी वा अन्य खानेकुरा दिनु हुँदैन। त्यसो गर्दा बेहोस भएको खण्डमा खाएको खानेकुरा फोक्सोमा जाने सम्भावना हुन्छ र थप जटिलता आउन सक्छ।
‘सर्पले टोकेको अंग नहल्लाइ राख्नपर्छ। धेरै हलचल नगरी उपचार केन्द्रसम्म आइपुग्नुपर्छ’, अभिषेकले भने।
सर्पले टोकेपछि जतिसक्दो चाँडो उपचार केन्द्रमै आइपुग्ने व्यवस्था गर्दा उत्तम हुने उनको भनाइ छ।
हेर्नूहोस् भिडियाे:
भर्खरै
लोकप्रिय
