झापा – उच्च शिक्षा अध्ययनका लागि विदेश उड्ने तयारीमा रहेका झापाका दुई जना युवा सवारी दुर्घटनामा परी सँधैका लागि अस्ताएका छन् ।
उच्च शिक्षा अध्ययनका लागि जापान जाने तयारीमा रहेकी झापा बाह्रदशी गाउँपालिका- ५ की १८ वर्षीया जेसिका सिग्देलको बुधबार साँझ भएको मोटरसाइकल दुर्घटनामा परी निधन भएको हो ।
बिहीबार दिउँसो झापाको चारपाने– राजगढ भित्री सडकअन्तर्गत झापा बाह्रदशी ५ को घोडामारा चोक नजिक मोटरसाइकल दुर्घटनामा परि बाह्रदशी ३ का २२ वर्षिय सनम हेमरमको निधन भएको जिल्ला प्रहरी कार्यालय झापाले जनाएको छ । उनी क्यानडा जाने अन्तिम तयारीमा रहेका उनका साथीहरूले बताएका छन् ।
उनको भिजा पनि आइसकेको र एक/दुई दिनमै उनी क्यानडा उड्ने तयारीमा रहेका थिए ।
बुधबार साँझको दुर्घटनामा परी मृत्यु हुने १८ बर्षिया किशोरी सिग्देल जापान जाने तयारीमा थिइन् । उनी महेन्द्र रत्न माध्यमिक विद्यालय अनारमनी बिर्तामोडबाट कक्षा १२ को परीक्षा उत्तीर्ण गरी उच्च शिक्षाका लागि जापान जान आफ्ना शैक्षिक कागजात पुर्याएर विराटनगरबाट फर्किँदै गर्दा झापामा दुर्घटनामा परेकी थिइन् ।
उनी सवार मोटरसाइकललाई विपरीत दिशाबाट आएको अर्को मोटरसाइकलले ठक्कर दिएको थियो । उनलाई अस्पताल पुर्याउने बितिक्कै चिकित्सकले मृत घोषणा गरेका थिए ।
भर्खरै
लोकप्रिय
