झापा- झापाको अर्जुनधारामा नेकपा एमालेका पोलिटब्युरो सदस्य महेश बस्नेत उपस्थित कार्यक्रममा सवारीसाधन तोडफोड गर्ने थप एक जनालाई प्रहरीले पक्राउ गरेको छ।
गत बिहीबार झापाको अर्जुनधारामा एमाले नेता बस्नेत प्रमुख अतिथि रहेको युवा संघको नगर अधिवेशनको उद्घाटन सत्रको कार्यक्रममा भएको गाडी तोडफोडको घटनामा संलग्न भएको आरोपमा मडिकल व्यवसायी दुर्गा प्रसाईंका कट्टर समर्थक विजय चौधरीलाई पक्राउ गरिएको इलाका प्रहरी कार्यालय, अनारमनी बिर्तामोडले जनाएको छ।
केही समयअघि तिनै चौधरीले बिर्तामोडमा आफैं पेट्रोल छर्केर आफ्नै शरीरमा आगो लगाउने प्रयास गरेका थिए। उनले शरीरमा दुर्गा प्रसाईंका ट्याटु बनाएका छन्।
सवारीसाधन तोडफोड भएकै दिन बिर्तामोडका बिक्रम लिम्बूलाई प्रहरीले पक्राउ गरेको थियो।
१३ वटा चारचक्के र ८ वटा दुई चक्के सवारीसाधनमा क्षति पुगेकाले क्षतिपूर्तिको मागसहित दोषीलाई मुलुकी अपराध संहिता २०७४ को दफा २८५ बमोजिम कार्वाही गर्नुपर्ने पीडितहरुले उजुरी दिएपछि चौधरीसमेत पक्राउ परेका हुन्।
भर्खरै
लोकप्रिय
