तीनपटक शरीरमा क्यान्सर लागेर पनि जितेका साइकलयात्री ध्रुव हुमागाईं मंगलबार बिहान एक्कासि झापाको बिर्तामोडमा भेटिए।काठमाडौंबाट झापा आइपुग्दा पाँच दिन लागेको उनले सुनाए। मंगलबार साँझ उनी इलामको फिक्कल पुगेका थिए। फिक्कलबाट साइकलमै उनी बुधबार बिहान दार्जिलिङ जानका लागि तयारी गरेर त्यहाँबाट हिँडे।
ध्रुवकाे यात्रा सिक्किमसम्मको रहेको उनले सुनाए। त्यहाँ पुगेर मुख्यमन्त्री पिएस गोलेसँग भेट गर्ने उनको इच्छा रहेको उनले बताए।
तीन पटक क्यान्सर लागेर त्यसबाट मुक्ति पाएका हुमागाईंको यो साहस देखेर बिर्तामोडमा उनलाई भेट गर्न आएका अर्का क्यान्सर पीडित देवी मावि बिर्तामोडका शिक्षक ज्ञानु बुढाथोकीले क्यान्सरबाट मुक्ति पाइने रहेछ भन्ने निकै ठूलो आशा पलाएको बताए।
हुमागाईं अहिले ५४ वर्षका भएका छन्। चार वर्षअघि क्यान्सर लाग्दा आफूलाई निकै ठूलो आघात पुगेको अनुभव उनले सुनाए।
परिवारका सदस्यहरूको सहयोग र मायाले आफू बाँचेको अनुभव पनि हुमागाईंले सुनाए। उनलाई पहिला फोक्सो, अनि मेरूदण्ड र त्यसपछि बोन म्यारोमा क्यान्सर लागेको थियो।
नेपालमा अस्पतालमा प्रारम्भिक उपचार गरेपछि भारतको राजीव गान्धी अस्पतालमा उपचारपश्चात आफू पहिलाको जस्तै सक्षम भएको हुमागाईं बताउँछन्।
‘म आफैंले आफैंलाई क्यान्सर फाइटर भन्न रुचाउँछु। तर क्यान्सरसँग फाइट गर्न चिकित्सकको निगरानीमा नियमित औषधि सेवन गर्नुपर्छ। खानपान चिकित्सककै सुझावमा नियमित हुनुपर्छ। परिवारको सहयोग चाहिन्छ’, उनले भने।
उनी अहिले दैनिक १ सय ३० किलोमिटरसम्म साइकल कुदाउन सक्षम भएका छन्। शारीरिक कसरतका लागि उनले दैनिक बिहान कम्तिमा दुई घण्टा साइकलमा यात्रा गर्ने गरेका छन्।
आत्मबल दह्रो बनाएर शारीरिक कसरत गरे क्यान्सरलाई जत्ने सकिने उनको भनाइ छ।
उनको दैनिकी अहिले क्यान्सर रोगीहरूको औषधि ओसार्नमा बित्ने गरेको छ। उनी भन्छन्, ‘कतिपयको डाक्टरसम्म पुग्ने पहुँच हुँदैन। त्यस्ता बिरामीका लागि म सहयोग गर्छु। क्यान्सर लाग्दा आत्तिनु पर्दैन। तर चिकित्सकसँग नियमित सम्पर्कमा रहनु पर्छ।’
अहिले हुमागाईं जहाँ जान्छन्, त्यहाँ क्यान्सर रोगीहरूलाई भेट्छन्। उनीहरूको आत्मबल बढाउँछन्। सकेको सहयोग गर्छन्।
उनी भन्छन्, ‘म पैसा सहयोग गर्न सक्दिनँ। तर उहाँहरूलाई चाहिएको औषधिदेखि खानपानका कुरामा म पुल बन्नसक्छु।’
भर्खरै
लोकप्रिय
