हतियार र लागुऔषधसहित भक्तपुरबाट दुई जना पक्राउ

काठमाडाैँ – अवैध हतियार र लागुऔषध खैरो हेरोइनसहित २ जनालाई प्रहरीले पक्राउ गरेको छ।

पक्राउ पर्नेहरुमा इलामको इलाम नगरपालिका–९ का चिरन्जीवी सिन्चुरी र नवलपुरको कावासोती नगरपालिका–२ का लेखबहादुर कार्की रहेका छन्।

शुक्रबार उनीहरुलाई भक्तपुरको सूर्यविनायक नगरपालिका–१० बाट पक्राउ गरिएको काठमाडौँ उपत्यका अपराध अनुसन्धान कार्यालयका प्रहरी उपरीक्षक मिलन केसीले जानकारी दिए।

उनीहरुलाई लागुऔषध खैरौ हेरोइनजस्तो देखिने लेसिलो पदार्थ ५ ग्राम, पेस्तोल १ थान, ५ राउण्ड गोली, म्यागजिन २ थान र २ थान मोबाइलसहित पक्राउ गरिएको केसीले बताए।

उनीहरुलाई लागुऔषध तथा हातहतियार खरखजानासम्बन्धी कसुरमा आवश्यक कारबाही तथा थप अनुसन्धानको लागि प्रहरी वृत जगाती पठाइएको प्रहरीले जनाएको छ।