झापा- नेकपा एकीकृत समाजवादीका सम्मानित नेता झलनाथ खनालले अबको चुनावमा पार्टीहरूले एक्लाएक्लै लड्नुपर्ने बताएका छन् ।
झापाको बिर्तामोडमा पत्रकाहरूसँग कुरा गर्दै नेता खनालले पहिला पनि पार्टीहरूले एक्लाएक्लै लड्नुपर्ने र अबका चुनाव पनि एक्लाएक्लै लड्नुपर्ने बताएका हुन् ।
उनले भने,’कांग्रेसको पनि अहिले अलि बुद्धि फिरेजस्तो छ । वामपन्थीको पनि बुद्धि फिर्ला । चुनाव एक्लै लड्ने हो ।’
कांग्रेस महासमिति बैठकमा पनि महामन्त्री गगनकुमार थापाले गठबन्धन गर्न नहुने प्रतिवेदन पेश गरेका थिए । पत्रकार सम्मेलनमा नेता खनालले सोही कुरा कोट्याउँदै चुनाव लड्न गठबन्धन जरुरी नरहेको बताए ।
आफ्नो दल सरकारमा सहभागी भए पनि सरकारले जनभावनाअनुरुप काम नगरेकोमा उनले चरम असन्तुष्टि जनाए । खनालले भने, ‘हाम्रा मन्त्रीहरूका मन्त्रालयमा बजेट छैन । कसरी काम गर्छन् ? अब हामी सरकारमा बस्ने वा बाहिरिने भन्ने विषय आगामी महाधिवेशनले तह गर्छ । हामी गम्भीर भएर समीक्षा गर्छौं ।’
मन्त्री प्रकाश ज्वालामाथि कारवाही र सरकारबाट फिर्ता बोलाउने विषयमा नेता खनाल खुलेर बोल्न चाहेनन् । उनले बालकुमारी घटनाको अध्ययन प्रतिवेदन आफूहरूले अध्ययन गर्न नपाएको उनले बताए ।
उनले भने, ‘बालकुमारीमा ड्याङ्ड्याङ् गोली प्रकाश ज्वालाले चलाउन लगाएको होइन होला । तर, उनले गल्ती गरेका छन् भने त्यस्को सजाय उनले भोग्नुपर्छ ।’
भर्खरै
लोकप्रिय
