झापा- कोशी प्रदेशको नयाँ मुख्यमन्त्रीमा नेकपा एमालेका संसदीय दलका नेता हिक्मत कार्कीले प्रदेश प्रमुख पर्शुराम खापुङसमक्ष दाबी पेश गरेका छन् ।
सोमबार सरकारलाई दिएको समर्थन फिर्ता लिएसँगै कार्कीले मुख्यमन्त्रीमा दाबी पेश गरेका हुन् ।
केन्द्रमा सत्ता समीकरण बनेसँगै कोशी प्रदेश सरकारबाट नेकपा एमाले र नेकपा माओवादी केन्द्रका सांसदहरूले समर्थन फिर्ता लिएपछि मुख्यमन्त्री केदार कार्की नेतृत्वको सरकार अल्पमतमा परेको हो ।
सत्ताको नेतृत्व हिक्मत कार्कीले गर्ने माओवादी केन्द्रसँगको सहमति बमोजिम दाबी पेश गरिएको कार्कीले देशसञ्चारलाई बताए ।
उनले भने, ‘अहिलेको सरकारलाई सबभन्दा पहिला हामीले समर्थन दिएको हो । त्यो फिर्ता लियौं । त्यसपछि बहुमत सांसदको नेतृत्वको दाबीसहित मैले मुख्यमन्त्रीमा दाबी पेश गरेको छु ।’
उनले तत्काल प्रदेश सभाको विशेष अधिवेशन आह्वान गर्न पनि आग्रह गरिएको बताए । मुख्यमन्त्री कार्कीले २०८१ साल जेठ ११ गतेका लागि प्रदेश सभा अधिवेशनका लागि गरिएको सिफारिसको कुनै अर्थ नरहेको उनले बताए ।
उनले भने, ‘सरकार अल्पमतमा परिसकेपछि उहाँको सिफारिसको के अर्थ छ र ? तत्काल अधिवेशन बोलाउनुपर्छ ।’
तर, अधिवेशन अगावै मुख्यमन्त्री केदार कार्कीले पदबाट राजीनामा दिने आशामा आफूहरू रहेको उनले बताए ।
भर्खरै
लोकप्रिय
