बुद्धको छायाँसँग

कैयौं बोधीवृक्षमुनि
कैयौं पल्ट सुस्ताएहुँला!

बसेको हुँला भोकै
एकलासको चिन्तन बोकेर!

अझै भौतारिएकै छु पहाड-मैदान
बनेर कुहिराको काग!

बुद्ध जन्मिएको तीन सहस्र वर्षपछि
म जन्मेको हुँ एउटा अध्यारो गाउँमा,
जहाँ अझै पुगेको छैन बुद्धत्व!

यता, म अभिशप्त भीष्म बनेर
आफ्नो निष्ठा अर्पिरहेछु
एक धृतराष्ट्र शासनप्रति!

अहो!
उहिले ज्ञानको खोजीमा
राजपाठको त्याग !
अहिले सत्तारोहणको निम्ती
अस्थिपन्जरको सोपान निर्माण !

आज,
म लोभको वंशीभूत भएर
इर्ष्याको हतियार बोकी
प्रतिषोधको आगोमा जलिरहँदा

संकोचमा छ मान्छे!
सन्देहमा छ शान्ति!
संकटमा छ धर्म!

‘अहिंसा परमो धर्म!’

बुद्धसम्म पुग्ने मार्ग मेरो
अझै सुदूर देखिरहेछु!

म आज बुद्धको छायाँसँग
याचना गरिरहेछु भिक्षा
अप्रतिम करूणाको

‘सर्वे भवन्तु सुखिन:’

बोधीमाटोमा
गहिरो जरा होस् प्रेमको
नमरोस् मानवता
नडगोस् परम् सत्य!

नमो तस्स
भगवतो अरहतो
सम्मा सम्बुद्धस्स !!!