वीरगञ्ज – नारायणी अस्पतालका मेडिकल सुपरिटेन्डेन्टले एकैपटक ४७ कर्मचारी हटाएर मनोमानी गरेको भन्दै अस्पताल विकास समितिले आपत्ति जनाएको छ।
समितिका अध्यक्ष र सदस्यहरुले मंगलबार विज्ञप्ति जारी गरी नारायणी अस्पतालमा निमित्त मेसु डा. एनामुल हकले समितिसँग कुनै समन्वय नै नगरी कर्मचारीहरु हटाएको भन्दै आक्रोश पोखेका हुन्।
मेसु हकले कर्मचारीहरुको मिलेमतोमा पूर्वाग्रह राखेर स्वेच्छाचारी तरिकाले अस्पतालका कर्मचारीहरुको सेवा अवधि समाप्त गरेको विकास समितिको भनाइ छ।
गरिब, असहाय तथा न्यून आर्थिक अवस्था भएका बिरामीहरुको केन्द्रका रूपमा रहेको अस्पतालमा कर्मचारीहरुलाई सेवाबाट हटाइएपश्चात सेवा प्रवाहमा समस्या भएमा त्यसको जिम्मेवारी निमित्त मेसु नै हुने विकास समितिका अध्यक्ष धिरज गुप्ताले बताए।
नारायणी अस्पतालले सोमबार सूचना प्रकाशन गरी दरबन्दीबेगर अस्पतालमा कार्यरत रहेका ४७ जना कर्मचारीहरुलाई सेवाबाट हटाएको छ। जसमध्ये दस जना डाक्टरहरु रहेका छन्।
यस्तै, अस्पतालमा कार्यरत स्टाफ नर्स, हेल्थ असिसटेन्ट, रेडियोग्राफरलगायत ४७ जना कर्मचारीहरुलाई सेवाबाट हटाइएको छ।
भर्खरै
लोकप्रिय
