बिर्तामोड – पूर्वाञ्चल दैनिकका डेस्कसम्पादक लक्ष्मण ढकाललाई यस वर्षको श्याम कृष्ण उपाध्याय स्मृति पत्रकारिता पुरस्कार प्रदान गरिएको छ । श्यामकृष्ण उपाध्याय स्मृति पुरस्कार गुठीले शनिवार बिर्तामोडमा एक कार्यक्रमकाबीच डेस्क सम्पादक ढकाललाई उक्त पुरस्कार प्रदान गरेको हो ।
१५ हजार ५ सय ५५ रुपैयाँ राशिको उक्त पुरस्कार कार्यक्रमका प्रमुख अतिथि पूर्व प्राध्यापक तथा वरिष्ठ साहित्यकार माधव भँडारीले ढकाललाई प्रदान गरेका थिए ।
२०३४ सालदेखि पत्रकारिता गर्दै आएका ढकालले विश्वदीप साहित्यिक मासिकबाट पत्रकारिताको यात्रा शुरु गरेका हुन् । उनले स्वतन्त्रता, जनस्वतन्त्रता लगायतका पत्रपत्रिकासहित कञ्चनजंघा एफएममा पनि समाचार सम्पादकको भूमिका निर्वाह गरिसकेका छन् ।
पूर्वाञ्चल स्तरीय उक्त पुरस्कारबाट यस अघि इलामका धर्म गौतम, झापाका मदन ढकाल, गोविन्दचन्द क्षेत्री, नकूल काजी, डिल्लीराम निर्भिक पुरस्कृत भइसकेका छन् । त्यसैगरी सुनसरीका गिरीराजमणि आचार्य, मोरङका कोशराज रेग्मी , सप्तरीका शिशुप्रसाद देवकोटा र शिवहरि भट्टराई पुरस्कृत भइसकेका छन् ।
पत्रकार उपाध्यायको निधनपछि छोरी आभाकुमारी उपाध्यायले गुठीको स्थापना गरेकी हुन् । १९८६मा जन्मिएका उपाध्यायले आलोक, केटो साप्ताहिक लगायत विभिन्न पत्रिकाको सम्पादक तथा विभिन्न तहमा रहेर सेवा गरेका थिए ।
पञ्चायती कालमा पनि पत्रकारितामार्फत लोकतन्त्रको लडाइँ लडेका उपाध्यायलाई मेची अञ्चलका जेठा पत्रकारका रुपमा सम्मान गरिएको छ । उनको २०४६ चैत १७ मा निधन भएको थियो ।
भर्खरै
लोकप्रिय
