संसदीय छानबिन समितिले रवि लामिछानेसहित २६ जनासँग सोधपुछ गर्दै

काठमाडौँ-सहकारी संस्थाको बचत रकम दुरुपयोग सम्बन्धमा संसदीय छानबिन विशेष समितिले पूर्व गृहमन्त्री एवं रास्वपा सभापति रवि लामिछानेसहित २६ जनालाई सोधपुछ गर्ने भएको छ।

सहकारी ठगीमा पुर्पक्षका लागि थुनामा रहेका र बाहिर रहेका समेत २६ जनासँग सोधपुछ गर्न लागिएको समितिका एक सदस्यले जानकारी दिए।

समितिले वास्तविक तथ्य पत्ता लगाउन सोधपुछ गर्न लागेको जनाइएको छ। प्रहरी अनुसन्धान जसरी नभई सोधपुछ गरेर तथ्य पत्ता लगाउने तयारी छ।

विदेश पलायन बाहेक २६ जनासँग सोधपुछ गर्ने तयारी भएको जनाइएको छ। शिवशिखर सहकारी अध्यक्ष केदारनाथ शर्मा, कान्तिपुर सहकारी पूर्वअध्यक्ष तथा पशुपति सहकारी अध्यक्ष सीबी लामा लगायतसँग समतिले सोधपुछ गर्ने तयारी छ।

समितिले यसअघि बचत तथा ऋण सहकारी केन्द्रीय संघ (नेफस्कुन), राष्ट्रिय सहकारी महासंघसँग पनि छलफल गरेको थियो। महालेखा परीक्षकको कार्यालयको प्रतिवेदनको विषयमा समेत छलफल गरेको समितिले गृहमन्त्री, सचिव, प्रहरी महानिरीक्षकसँग समेत छलफल गरेको छ।