काठमाडौँ – नेपाल प्रिमियर लिग (एनपिएल) मा बुधबारदेखि उपाधि दौडको रोमाञ्चक्ता सुरु हुँदै छ। प्लेअफ समीकरण पूरा भएसँगै एक दिनको विश्रामपछि एनपिएलको अर्को चरण सुरु हुन लागेको हो। टियू मैदान कीर्तिपुरमा हुने खेलमा दर्शकको भव्य उपस्थितिको आँकलन गरिएको छ।
प्लेअफ समीकरण पूरा भएसँगै बुधबार दिनको पहिलो खेलमा बिहान ९ बजे चितवन राइनोज र कर्णाली याक्सबीच ‘इलिमिनेटर’ चरणको पहिलो खेल हुनेछ। यो खेल जित्ने टिमले फाइनल पुग्नका लागि ‘क्वालिफाइर–२’ मा स्थान बनाउने छ।
दिनको दोस्रो खेल भने धेरैका लागि प्रतिक्षित छ। लिगको शीर्ष स्थानमा रहेर क्वालिफायर पुगेका सुदूरपश्चिम रोयल्स र जनकपुर बोल्ट्सबीच फाइनल पुग्न दिउँसो १ बजे भिडन्त हुनेछ। सुदूरपश्चिम र जनकपुरबीचको विजेताले उपाधि भिडन्तमा यात्रा पक्का गर्नेछ।
पराजित टोलीले अर्को एउटा अवसर प्राप्त गर्नेछ। बिहीबार चितवन र कर्णालीबीचको विजेतासँग दोस्रो क्वालिफायर खेल्ने छ। त्यसमा विजेता टोलीले शनिबार हुने फाइनलको टिकट पक्का गर्नेछ।
विजेतालाई १ करोड १० लाख
नेपाल क्रिकेट संघ (क्यान)ले नेपाल प्रिमियर लिगको विजेतालाई १ करोड १० लाख रुपैयाँ पुरस्कार घोषणा गरेको छ। यो नेपाली खेलकुदकै सर्वाधिक उच्च पुरस्कार राशि हो।
त्यस्तै, दोस्रो हुने टोलीले ५१ लाख, तेस्रो हुनेले २५ लाख र चौथो हुने टोलीले १५ लाख प्राप्त गर्ने क्यानले विज्ञप्तिमार्फत जानकारी दिएको हो।
एनपिएलका शीर्ष ४ टोलीले पुरस्कार राशिमै कुल २ करोड १० लाख रुपैयाँ प्राप्त गर्नेछन्। यसअघि नै क्यानले उत्कृष्ट नेपाली खेलाडीलाई कार दिने घोषणा गरिसकेको छ। यसबाहेक क्यानले प्रत्येक खेलको प्लेयर अफ दि म्याचलाई ५० हजार र क्याच अफ दी म्याच हुनेलाई २५ हजार प्रदान गर्दै आएको छ।
भर्खरै
लोकप्रिय
