काठमाडौं– नयाँ बानेश्वर चोकको छक्कु बक्कु पार्क अगाडि नेपाली कांग्रेसको सभा आयोजना भईरहेको थियो भने एभरेष्ट होटलको अगाडि पट्टि एकीकृत राप्रपा राष्ट्रवादीको कार्यक्रम थियो। यसगरी बानेश्वर चोक आसपासमा फुटफाथमा पसल गर्नेहरु आफ्नै सुरमा व्यस्त थिए। कोहि नेताका भाषण सुन्दै थिए भने कोहि सामान किन्दै।
बानेश्वरमा धरै मानिसहरु जम्मा भएकाले आमसभामा सहभागीहरुलाई बदाम बेच्ने प्रतिस्पर्धा चल्दै थियो। ठेलागाडामा बदाम बेच्दै गरेकी सिन्धुली घर भएकी डम्बरी देवकोटाले जिस्किँदै भनिन् बदाम बेचेर भोट हाल्न जाने खर्च जुटाउ भनेको मान्छे भन्दा बदाम बेच्ने बेसी भए।
सर्लाही घर भएका सन्तोष कुमार दाशलाई पनि ठूलाठूला माईक बज्दै भईरहेको चुनावी सभाले छोएको थिएन। बेलुका ब्यापार गर्न आफ्ना समान मिलाउँदै उनले देशसंचार सँग भने, अस्ति कार्यक्रम गर्नेले सडक नै कब्जा गरेको थियो आज जे होस् गाडीलाई जान दिईएको छ।
व्यस्त बानेश्वर चोकमा गत मंगलबार बाम गठबन्धनले सडक अवरोध गरी कार्यक्रम गरेपछि सामाजिक संजालमा व्यापक आलोचना भएको थियो।
सर्लाही ४ का मतदाता रहेका दासले मंगलबार मत दिन गाउँ जाने बताए।
नेपाली कांगेसको कार्यक्रममा सहभागीका लागि व्यवस्था गरिएका कुर्ची नपुगेर धेरै मानिसहरु उभिएका देखिन्थे भने एकीकृत राप्रपा राष्ट्रवादीको कार्यक्रममा सहभागीको तुलनामा कुर्ची धेरै थिए।
चर्चित गित कुटुमा कुटु, सुन साहिली, काले दाई काले दाई, ठमेल बजार लगाएतको लयमा कांग्रेसलाई मत माग्दै बनाएका गीतहरु बजिरहेका थिए। कार्यक्रम स्थलको सुरक्षाका लागि तालिम प्राप्त कुकुरहरु पनि प्रयोग गरिएका थिए।
सधैँ जस्तो चहलपहल हुने छक्कु बक्कु पार्कमा आज दिउँसो अन्य दिन भन्दा बढी भिड थियो। छक्कु बक्कुपार्कमा कुसुन्ती ललितपुरका ७५ बर्षिय कृष्ण बहादुर लिम्बू नयाँ पार्टीले असन्तुष्ट भोट तान्ने हुँदा निर्वाचन जित्न प्रयाप्त नहुने बताउँदै थिए। कुराकानीको क्रममा उनले ६ बर्ष ब्रिटिस आर्मीमा काम गरि छोडेर नेपाल आई पञ्चायतकालमा ४ कार्यकाल प्रधानपञ्च भएको बताए। बहुदल आए पछि राजनीति गरेन। नेकपा एमालेका अध्यक्ष केपी ओली उठेको क्षेत्र झापा ५ मा नामावली भएकाले सोमबार दमक जाने उनले बताए। काठमाडौं १ मा प्रकाशमानलाई कसैले हल्लाउन सक्दैन लिम्बूले भने, मैले यहाँ मेरा नेवार साथीहरु सँग कुरा गरेको छु उनीहरुले जे भए पनि प्रकाशमानलाई मत दिने भनेर भन्ने गरेका छन्।
नेपाली कांग्रेसले केहि गल्ति त गरेको छ २०३५ साल देखी कांग्रेस कृयासिल सदस्य रहेको बताउने काठमाडौं १ का मतदाता बिष्णु प्रजापतीले भने, तैपनी लोकतन्त्रको रक्षाका लागि कांगेसलाई नै मत दिन्छु।
केहि मानिसहरु चुनावि कार्यक्रममा व्यस्त रहँदा फुटपाथमा समान किन्ने र बेच्नेको भिड उस्तै थियो। बेलुका सधैं जसो चहलपहल हुने बानेश्वरमा चुनावि कार्यक्रमले भीडभाड बढाएको देखिन्थ्यो।
कांग्रेसका प्रदेश सभा उम्मेदवार दीपेन्द्र श्रेष्ठ र सुरज चन्द्र लामिछाने सँगै प्रतिनिधि सभा उम्मेदवार प्रकाशमान सिंहले बाम गठबन्धनको कडा आलोचना गरेका थिए। विवेकशील साझा पार्टीलाई व्यंग्य गर्दै सिंहले सामाजिक संजालबाट जन्मेको पार्टीले जनताका समस्या बुझ्न नसक्ने भन्दै जनताको दुख र कष्ट बुझेको पार्टी नेपाली कांग्रेसलाई मत दिन आग्रह गरे।
उनले अहिले धेरै मिडियाहरुले मिसन पत्रकारिता गरिरहको आरोप लगाए। मिडियामा नेपाली कांगेसले गरेका राम्रा कामहरु प्रकाशित हुदैनन् सिंहले भने, तर केहि साना कमजोरिहरु भए ठुला अक्षरमा प्रकाशित हुने गर्छन्।
उनले, २०४७ मा प्रजातन्त्रको पुनर्स्थापना पछि कांग्रेसले नै मिडियालाई राज्यको चौथों अंगको रुपमा मान्दै निर्भय पुर्वक लेख्न पाउने वातावरण बनाएको बताउँदै बाम गठबन्धनले निर्वाचन जिते उनीहरुले मिडियालाई नियन्त्रण राख्ने दावी गरे।
कांग्रेसले संविधान दिन्छु भन्दै २०७० मा मत मागेको स्मरण गराउँदै उनले अब सम्वृद्धिका लागि मत मागिरहेको र निर्वाचित भए देशलाई सम्वृद्ध बनाउने अभियानमा लाग्ने प्रतिबद्धता व्यक्त गरे।
करिब १ घण्टा भाषण गरेका सिंहले अरुको आलोचना भन्दा पनि मतदाताको तारिफमा समय खर्च गरेका थिए।
कार्यक्रममा ढिलो गरि सहभागी भएका काँग्रेस युवा नेता गगनकुमार थापाले २०७० सालमा मत माग्न जादैँ गर्दा मतदाताले बिजुली चाहियो भन्नु हुन्थ्यो तर अहिले उहाँहरुले लोडसेडिङलाई भुल्नु भएको छ। ठिक त्यसै गरी कांग्रेसले संविधान ल्याउन गरेको योगदान मतदाताले स्मरण गर्न नसकेको बताए। उनले प्रश्न गरे, एकपटक सम्झिनुस् २०७२ सालमा संविधान नआएको भए के हुन्थ्यो? काँग्रेसको मध्यमार्गी चरित्रका कारण देशले संविधान प्राप्त गरेको भन्दै संविधान कार्यान्वयनका लागि संसदमा काँग्रेस जस्तो मध्यमार्गी पार्टी गणितीय रुपमा बलियो हुनु पर्ने बताए।
कांग्रेसको कार्यक्रमको तुलनामा एकीकृत राप्रपा राष्ट्रवादीको कार्यक्रम सहभागीको संख्या कम भए पनि उक्त पार्टीका अध्यक्ष डाक्टर प्रकाश चन्द्र हिन्दु राष्ट्र र राजा सहितको प्रजातन्त्र अहिलेको आवश्यकता हो भनिरहेका थिए।
यो पनी हेर्नुहोस्:
भर्खरै
लोकप्रिय
