म्याड्रिड- वेल्स स्ट्राइकर गारेथ बेलले मैदान छिरेको एक मिनेटमै गोल गरेपछि स्पेनिस क्लब रियल म्याड्रिड क्लब विश्वकपको फाइनलमा पुगेको छ। साविक युरोपियन च्याम्पियन तथा स्पेनिस लिग च्याम्पियन रियलले बुधबार राति भएको सेमिफाइनलमा अल जजिरालाई २–१ गोलले हरायो।
रियल म्याड्रिडका क्रिस्टियानो रोनाल्डोेले पनि गोल गरे तर बेलले गरेको गोल निर्णायक रह्यो। ८१ औं मिनेटमा बेल मैदान छिरेका थिए र सोही मिनेटमा उनले लुकासको पासमा गोल गरे। बेल दुई महिनाको आरामपछि बुधबार राती खेलमा फर्किएका थिए।
२८ वर्षीय बेलले यो सिजनमा केवल ११ खेल खेलेका छन् जसमा चार गोल मात्र गरेका छन्। उनलाई सन् २०१३ मा रियलले विश्व कीर्तिमानी स्थानान्तरण मुल्यमा क्लब भित्र्याएको थियो। त्यसयता उनले रियलका लागि एक सय ६१ खेलमा ७१ गोल गरेका छन्। चोटका कारण उनले आफ्नो स्तर अनुसारको प्रदर्शन गर्न सकिरहेका छैनन्। बेलकै प्रदर्शनमा वेल्स गत युरोकपको सेमिफाइनलसम्म पुगेको थियो।
भर्खरै
लोकप्रिय
