काठमाडौँ- मंसिर १० र २१ गते पहिलो र दोस्रो चरणमा भएको प्रतिनिधिसभा र प्रदेशसभा सदस्य निर्वाचन अन्तर्गत समानुपातिकतर्फ ७५ जिल्लाको मतगणना सकिएको निर्वाचन आयोगले जनाएको छ।
आयोगले समानुपातिक निर्वाचन प्रणालीअन्तर्गत अब सुनसरी र सर्लाहीका केही निर्वाचन क्षेत्रमा गणना जारी रहेको जनाएको छ। सुनसरीको क्षेत्र नं १ तथा सर्लाहीको क्षेत्र नं २, ३ र ४ मा मतगणना कार्य जारी छ।
हालसम्म ९३ लाख ७२ हजार ५४४ मतगणना भएको छ । पछिल्लो मत परिणामअनुसार एमाले ३१ लाख ६१ हजार २९५ मत ल्याएर पहिलो स्थानमा छ। काँग्रेस ३१ लाख ११ हजार ६४३ मतसहित दोस्रो र नेकपा माओवादी केन्द्र १२ लाख ९५ हजार ९०३ मत ल्याएर तेस्रो स्थानमा छ।
राष्ट्रिय जनता पार्टीले चार लाख ७० हजार ४८६, संघीय समाजवादी फोरम नेपालले चार लाख ६९ हजार ४६१ र विवेकशील साझा पार्टीले दुई लाख १२ हजार २९३ मत प्राप्त गरेका छन्।
राष्ट्रिय प्रजातन्त्र पार्टीले एक लाख ९६ हजार १९०, राष्ट्रिय प्रजातन्त्र पार्टी प्रजातान्त्रिक ८८ हजार २८०, नयाँ शक्ति पार्टी नेपाल ८१ हजार ४४६ र राष्ट्रिय जनमोर्चाले ६२ हजार १२३ मत प्राप्त गरेका छन्।
नेपाल मजदुर किसान पार्टी, नेपाल संघीय समाजवादी पार्टी, संघीय लोकतान्त्रिक राष्ट्रिय मञ्चलगायत दलहरुले ३ लाख ५४ हजार ४०५ मत पाएका आयोगले जनाएको छ। (रासस)
भर्खरै
लोकप्रिय
