मुम्बई-भारतको मुम्बर्इस्थित कमला मिल्समा शुक्रबार बिहानैदेखि भएको आगलागीबाट ज्यान गुमाउनेको संख्या १४ पुगेको किङ् एड्वार्ड मेमोरिएल (केइएम) अस्पतालले शुक्रबार जानकारी दिएको छ।
यस आगलागीबाट १२ जना घाइते भएका छन्। मृतकमा तीन पुरुष र ११ महिला छन्। महिलासहित उनीहरुको केइएम अस्पतालमा उपचार भइरहेको अस्पतालका मेडिकल अधिकारी अभिनास सुपेले जानकारी दिए।
आगलागी नियन्त्रणमा लिन दुर्घटनास्थलमा छवटा दमकल पुगेका र आगो पूर्ण रुपमा निभाउन नसकिएको बिहान जनाइएको थियो। मध्यान्ह्सम्म आगो नियन्त्रणमा लिइएको बताइएको छ। आगलागीको कारण पत्ता लागेको छैन। कारण पत्ता लगाउन प्रहरीले अनुसन्धान सुरु गरेको बताइएको छ।
आगलागीबाट ज्यान गुमाएकाहरुप्रति श्रद्धाञ्जलि प्रकट गर्दै भारतीय प्रधानमन्त्री नरेन्द्र मोदीले परिवारका सदस्यजनप्रति समवेदना व्यक्त गरेका छन्। यस दुःखको घडीमा परिवारजनलाई धैर्यधारण गर्ने शक्ति प्राप्त होस् र यस घटनाबाट घाइते भएका व्यक्तिको छिटै स्वास्थ्य लाभ होस् भनी प्रधानमन्त्री मोदीले आफ्नो ट्विट अकाउन्टमा लेखेका छन्।
यो पनि हेर्नुहोस्:
भर्खरै
लोकप्रिय
