पोखरा- पोखरामा भोलि (बुधबार) देखि सञ्चालन हुन गइरहेको राखेप च्याम्पियनसिप २०७४ अन्तर्गत राष्ट्रिय ह्याण्डबल प्रतियोगिताको उद्घाटन खेलमा विभागीय टोली सशस्त्र प्रहरी बलको एपिएफ र घरेलु टिम पश्चिमाञ्चलबीच प्रतिष्पर्धा हुने भएको छ।
नेपाल ह्याण्डबल संघ र कास्की जिल्ला ह्याण्डबल संघको आयोजनामा पोखरा रंगशालामा सञ्चालन हुने उक्त प्रतियोगिता अन्तर्गत १८ औं पुरुष ह्याण्डबलको उद्घाटन खेलमा एपीएफ र पश्चिमाञ्चलको खेल हुने नेपाल ह्याण्डबल संघका अध्यक्ष तेज गुरुङले बताए।
उनका अनुसार औपचारिक खेल १ बजे भए पनि बिहानैदेखि पोखरा रंगशालामा महिला तथा पुरुषका लिग चरणको खेल सञ्चालन सुरु हुने भएको छ। प्रवेश निशुल्क रहेको उक्त प्रतियोगिता भलिबल प्रशिक्षण केन्द्रको परिसर र रंगशालाको पूर्वपट्टिको भागमा हुने भएको हो।
पुष २२ गतेसम्म पोखरामा सञ्चालन हुने १८ औं पुरुष तथा ९ औं महिला राष्ट्रिय ह्याण्डबल प्रतियोगिताको अन्तिम तयारी पूरा भएको संघले जनाएको छ। प्रतियोगितामा दुई विभागीय र पाँच विकास क्षेत्रका एक/एक गरी महिला तथा पुरुष तर्फ ७/७ टिम सहभागी हुने भएका छन्।
यो पनि हेर्नुहोस्:
भर्खरै
लोकप्रिय
