लन्डन– इङ्लिस प्रिमियर लिग फुटबलमा आइतबार राती शीर्षस्थानमा रहेकोे म्यानचेस्टर सिटीले लिभरपुलको सामना गर्दै छ।लिभरपुलको मैदानमा हुने यस खेलमा घरेलु टोलीलाई सिटीको गति रोक्ने अवसर छ। म्यान सिटी यो सिजन प्रिमियर लिगमा अपराजित रहेको छ।
म्यान सिटी दोस्राे स्थानमा रहेको म्यानचेस्टर युनाइटेडभन्दा १५ अंकले अगाडि छ भने लिभरपुलभन्दा १८ अंकले।
म्यान सिटीले यो सिजन बलिया टोलीलाई पराजित गरिसकेको छ।
सिटीले यो सिजन खेलेका लिगका ११ अवे खेलमा केवल क्रिस्टल प्यालेससँग मात्र बराबरी खेलेको थियो।
लिभरपुल पनि १७ खेलयता अपराजित रहेको छ। तर गत सेप्टेम्बरमा म्यान सिटीको मैदानमा उत्रिएको लिभरपुल ५–० गोलले पराजित भएको थियो। प्रिमियर लिगमा म्यान सिटीसँग भएका पछिल्ला चार भिडन्तमा लिभरपुलले दुई जित, एक बराबरी र एक हारको नतिजा निकालेको छ।
प्रिमियर लिगमा लिभरपुलले यो सिजन १२ जित, आठ बराबरी तथा दुई हार र म्यान सिटीले २० जित र दुई बराबरीको नतिजा निकालेको छ।
भर्खरै
लोकप्रिय
