धनगढी – पदभार ग्रहणका लागि प्रदेश प्रमुखको उत्तरबेहडी स्थित सचिवालयमा दिउँसो २ बजे पुगेका प्रदेश नम्बर ७ का प्रमुख मोहनराज मल्लले गाडीबाट झरेलगत्तै फोटो खिचाउने व्यवस्था खोई भन्दै प्रश्न गरेका थिए ।
उनको स्वागतमा खटिएको क्षेत्रिय प्रशासक लक्ष्मीराम पौडेल लगायतको टोलीले फोटो खिचाउनका लागि पत्रकार बोलाएको जानकारी उनलाई गराएका थिए ।
क्यामरा बोकेका पत्रकार देखेपछि मल्लको मुहार चम्किलो देखिएको थियो । क्षेत्रीय प्रशासकले फोटो खिच्नु अघि सेनाको सलामी अर्पणका लागि मल्ललाई आग्रह गरेका थिए ।
मल्लले सचिवालयमा आउनुअघि वनदेवी मन्दिर छेउमा रहेको सरकारी आवासमा गएर खाना खाएका थिए । त्यहाँ पुगेका समर्थक सुभेच्छुकहरुसँग सेल्फी खिचेका मल्लले तस्बिरलाई भाइरल बनाउन आग्रह गरेका थिए ।
पदभार ग्रहण गरिसकेपछि पत्रकारहरुसँग परिचय सहित संक्षिप्त कुराकानी गरेका मल्लले आफूलाई सहयोग गर्न आग्रह गरेका थिए ।
उनले बुढेसकालमा आफूले पाएको जिम्मेबारी कुशलतापुर्वक निभाउने बताए । आफूले जीवनभर निश्कलंक राजनीति गरेको बताएका मल्लले मुख्यमन्त्रीको कुशल सल्लाहकार भएर काम गर्ने बताए ।
शपथ समारोहमा २ सांसद अनुपस्थित
आइतबार प्रदेश नम्बर ७ का प्रदेशसभा सदस्यले पद तथा गोपनीयताको शपथ लिएका छन् ।
जिल्ला समन्वय समितिको सभा हलमा रहेको प्रदेशसभा भवनमा प्रदेश नम्बर ७ का ५१ जना प्रदेशसभा सदस्यहरुले पद तथा गोपनियताको शपथ लिएका हुन् ।
प्रदेशसभामा ५३ जना सदस्य रहे पनि दुईजना भने अनुपस्थित रहे ।
छोरीको विवाह भएका कारण डोटीका भरत खड्का र काठमाडौंबाट आउन नसकेपछि कैलालीकी सांसद चुनकुमारी चौधरी शपथ कार्यक्रममा उपस्थीत भएनन् ।
प्रदेश प्रमुख मोहनराज मल्लले ज्येष्ठ सांसद दिव्येश्वरी शाहलाई शपथ खुवाएपछि शाहले उपस्थित अन्य सबै सांसदहरुलाई शपथ खुवाएकी हुन् ।
भर्खरै
लोकप्रिय
