मड्रिड –स्पेनिस ला लिगा फुटबल अन्तर्गत आइतबार राति भएको खेलमा साबिक विजेता रियल मड्रिडले शानदार जित दर्ता गरेको छ ।
स्टार स्ट्राइकर क्रिष्टियानो रोनाल्डो र ग्यारेथ बेल चम्किएको खेलमा रियल मड्रिडले डिप्रोटिभो डी ला कोरुनालाई ७–१ ले हराएको हो । घरेलु मैदानमा भएको खेलमा रियल मड्रिडलाई जिताउन रोनाल्डो, बेल र नाचोले समान दुई दुई गोल गरे ।
यस्तै लुका मोड्रिकले एक गोल थपे । डिप्रोटिभोका लागि एड्रिएन लोपेजले एक गोल गरे । खेलमा अग्रता भ्रमण टोली डिप्रोटिभोले लिएको थियो । २३ औँ मिनेटमा लोपेजको गोलबाट डिप्रोटिभोले अग्रता लिएको हो ।
तर ३२ औँ मिनेटमा नाचोले रियल मड्रिडका लागि बराबरी गोल फर्काए । ४२ औँ मिनेटमा बेलले व्यक्तिगत पहिलो गोल गरे पछि पहिलो हाफमा रियलले २–१ को अग्रता लियो ।
दोस्रो हाफमा जिनेदिन जिदानको टिम रियल मड्रिडले थप पाँच गोल गर्यो । ५८ औँ मिनेटमा बेलले व्यक्तिगत दोस्रो गोल तथा ६८ औँ मिनेटमा मोड्रिकले गोल गरेपछि रियलको अग्रता ४–१ मा पुग्यो ।
त्यसपछि रोनाल्डोले लगातार दुई गोल गरे । उनले ७८ र ८४ औँ मिनेटमा गोल गर्दै रियललाई ६–१ को अग्रता दिलाए । ८८ औँ मिनेटमा नोचोले व्यक्तिगत दोस्रो गोल गरेपछि रियल मड्रिड ७–१ ले विजयी भयो ।
लिगमा गएको डिसेम्बर ९ पछि रियलको यो पहिलो जित हो । जितपछि १९ खेलबाट ३५ अंक जोडेको रियल मड्रिड चौथो स्थानमा उक्लिएको छ । तर शीर्ष स्थानको बार्सिलोना भन्दा उ १९ अंकले पछि रहेको छ । 
भर्खरै
लोकप्रिय
