रियल मड्रिडले यो सिजन च्याम्पियन्स लिगमा राम्रो गर्दै आए पनि घरेलु प्रतिस्पर्धामा कमाजोर देखिँदै आएको छ । पछिल्लो पटक बुधबार राति स्पेनिस कोपा डेल रे फुटबल अन्तर्गत क्वाटरफाइनलको दोस्रो लेगमा लेगानेससँग पराजित भएर प्रतियोगिताबाट बाहिरिएको छ ।
पहिलो लेगमा १–० ले विजयी भएको रियल मड्रिड बुधबार राति घरेलु मैदानमा भएको खेलमा लेगानेससँग २–१ ले पराजित भयो । समग्रमा २–२ को बराबरी भए पनि अवे गोलका आधारमा लेगानेस सेमिफाइनलमा प्रवेश गर्न सफल भयो ।
रियल मड्रिड भने प्रतियोगिताबाट बाहिरिन बाध्य भयो । ३१ औँ मिनेटमा जावियर एरासोले गोल गर्दै पहिलो हाफमा लेगानेसलाई १–० को अग्रता दिलाए ।
रियलका लागि ४७ औँ मिनेटमा करिम बेन्जिमाले बराबरी गोल फर्काए । त्यसको सात मिनेटपछि एप्पेल्ट पिरेसले गोल गर्दै लेगानेसलाई फेरि अग्रता दिलाए । स्टार स्ट्राइकर क्रिष्टियानो रोनाल्डो र ग्यारेथ बेल बिना खेलेको रियल मड्रिडले त्यसपछि गोल गर्न सकेन ।
समग्रमा २–२ को बराबरी भए पनि अवे गोलका कारण लेगानेसले अघिल्लो चरणको यात्रा तय गर्न सफल भयो । १९ पटक कोपा डेल रेको उपाधि जितेको रियल मड्रिड यसपटक भने क्वाटरफाइनलबाटै बाहिरियो ।
रियल मड्रिडले यो सिजन अहिलेसम्म ला लिगाका चार खेलमा हार बेहोरिसकेको छ । उ ला लिगामा शीर्ष स्थानको बार्सिलोना भन्दा १९ अंकले पछि रहेको छ ।
यो सिजन रियलको उपाधि आशा अब च्याम्पियन्स लिगमा मात्रै छ । उसले अन्तिम १६ मा कडा प्रतिस्पर्धी पेरिस सेन्ट–जर्मेनको समाना गर्नु पर्नेछ । पहिलो लेगमा रियलको मैदानमा आउँदो फेब्रुअरी १४ मा हुनेछ ।
भर्खरै
लोकप्रिय
