अमेरिकाले १८ लाख आप्रवासीलाई अमेरिकाको नागरिकता दिने योजना ल्याउने तयारी गरेको छ । राष्ट्रपति कार्यालय ह्वाइट हाउसले मेक्सिकोसँगको सीमा बनाउने भनिएको पर्खालका लागि रकम जुटाउने शर्तमा १८ लाख आप्रवासीलाई अमेरिकाको नागरिकता दिने योजना ल्याउन लागेको अमेरिकी सञ्चारमाध्यमले जनाएका छन् ।
आप्रवासी सम्बन्धी नयाँ योजनाका बारेमा डेमोक्र्याटिक सिनेटरसँग वार्ताको तयारी भइरहेका बेला रिपब्लिकन पार्टीका सदस्यको भेलामा ट्रम्पका एक वरिष्ठ सहयोगीले यो योजनाका बारेमा जानकारी दिएका हुन् । यो प्रस्ताव सोमबार सार्वजनिक हुने र यसमा मेक्सिकोसँगको सीमा बनाउने भनिएको पर्खालका लागि २५ बिलियन डलरको माग गरिएको हुनेछ ।
डेमोक्र्याटिक सिनेटरले सीमा पर्खालका लागि गरिने खर्चको विरोध गर्ने बताउँदै आएका छन् । यहि हप्ता डेमोक्र्याटिक सिनेटर चक शुमरले आफूहरुले सीमा पर्खालका लागि गरिने खर्चको विरोध गर्ने बताएका थिए । ह्वाइट हाउसका रणनीतिक प्रमुख स्टीफन मिलरले रिपब्लिकन सदस्यलाई बिहीबार नयाँ योजना बारे जानकारी दिएको अमेरिकी सञ्चारमाध्यमले बताएका छन् ।
यो योजना अन्तगृत १८ लाख आप्रवासीलाई अबको १० देखि १२ वर्षभित्र अमेरिकाको नागरिकता दिने उल्लेख छ । यसमा झण्डै सात लाख ‘ड्रिमर्स’ रहने छन् । बाल्यकालमा अमेरिका छिरेकालाई ड्रिमर्स भनिन्छ ।
बाराक ओबामाको कार्यकालमा उनीहरुलाई डाका कार्यक्रम अन्तर्गत सुरक्षा प्रदान गरिएको थियो । डाका लागि योग्य रहेका तर त्यसमा निवेदन नदिएका थप ११ लाखलाई पनि नागरिकता दिने ट्रम्प प्रशासनको योजना छ । तर त्यसका लागि सीमा पर्खालका लागि बजेट जुटाउन सहमति दिनु पर्छ ।
भर्खरै
लोकप्रिय
