ओस्कार विजेता अभिनेता केसी एफ्लेक यो वर्षको ओस्कार अवार्डमा सहभागी हुन नपाउने भएका छन् । उनीमाथि लागेको यौन हिंसाको आरोपका कारण एफ्लेकलाई ओस्कार अवार्डमा सहभागी हुनबाट रोक लगाइएको उनको प्रचारप्रसार टिमले पुष्टि गरेको छ ।
गएको वर्ष म्यानचेस्टर बाइ द सि चलचित्रका लागि सर्वोत्कृष्ट अभिनेताको अवार्ड जितेका एफ्लेकले यो वर्ष ओस्कारको परम्परा अनुसार सर्वोत्कृष्ट अभिनेत्रीलाई अवार्ड प्रदान गर्न जानु पर्ने थियो ।
तर एफ्लेकलाई ओस्कार कमिटिले नबोलाउने निर्णय गरेको हो । ओस्कार कमिटिकी प्रवक्ताले पनि अभिनेता एफ्लेक यो वर्षको ओस्कार अवार्डमा सहभागी नहुने पुष्टि गरेकी छन् ।
अभिनेता एफ्लेकमाथि सन् २०१० मा आइ एम स्टिल हेयर चलचित्रकी निर्माता एमान्डा ह्वाइट तथा छायाँकार माग्डालेना गोर्काले चलचित्र निर्माणको क्रममा यौन हिंसा गरेको आरोप लगाएका छन् ।
यो चलचित्र एफ्लेकको निर्देशनमा बनेको थियो । यो पुरानो मुद्दा भएपनि अहिले हलिवुडमा यौन हिंसा विरुद्ध अभियान चलेकाले एफ्लेकलाई ओस्कारमा नबोलाउने निर्णय भएको बताइएको छ ।
भर्खरै
लोकप्रिय
