काठमाडौं – भारतले शुक्रबार ६९ औँ गणतन्त्र दिवस मनाउँदै छ । ६८ वर्ष पहिले नयाँ संविधान बनेर गणतन्त्र स्थापना भएको दिनको सम्झनामा हरेक वर्ष जनवरी २६ का दिन भारतले गणतन्त्र दिवस मनाउने गरेको छ ।
दिवसको अवसरमा शुक्रबार राजधानी नयाँ दिल्लीमा विशेष समारोह हुँदैछ । राष्ट्रपति रामनाथ कोविन्दले विभिन्न सम्मान वितरण गर्ने छन् । यस्तै प्रधानमन्त्री नरेन्द्र मोदीले सम्बोधन गर्ने कार्यक्रम पनि छ ।
गणतन्त्र दिवसको कार्यक्रमका लागि राजधानी नयाँ दिल्लीसहित देशभरको सुरक्षा व्यवस्था कडा पारिएको भारतीय सञ्चारमाध्यमले जनाएका छन् । ६८ वर्ष अघि बनाइएको आधुनिक भारतको संविधानमा अहिलेसम्म एक सय एक पटक संशोधन गरिएको छ ।
राष्ट्रपति बनेपछि पहिलो पटक गणतन्त्र दिवसको अवसर पारेर बिहीबार राष्ट्रको नाममा सम्बोधन गर्दै राष्ट्रपति कोविन्दले लोकतन्त्र, कानुनको शानसन तथा बालिका शिक्षालाई जोड दिनु पर्ने बताए ।
भारतको गणतन्त्र दिवसको अवसरमा नेपालका राष्ट्रपति विद्यादेवी भण्डारीले आफ्ना भारतीय समकक्षी रामनाथ कोविन्द, उपराष्ट्रपति नन्दबहादुर पुनले भारतका उपराष्ट्रपति बैंकया नायडू र प्रधानमन्त्री शेरबहादुर देउवाले आफ्ना समकक्षी नरेन्द्र मोदीलाई शुभकामना व्यक्त गरेका छन् ।
भर्खरै
लोकप्रिय
