अफगानिस्तानको राजधानी काबुलमा आत्मघाती बम विस्फोट हुँदा कम्तिमा ९५ जनाको ज्यान गएको छ । काबुलको मध्य क्षेत्रमा भएको विस्फोटमा परि १५८ जना घाइते भएको सरकारी अधिकारीले बताएका छन् ।
आक्रमणकारीले विस्फोटक पदार्थले भरिएको एम्बुलेन्स सरकारी कार्यालय तथा विदेशी दूतावस रहेको र सुरक्षा व्यवस्था निकै कडा रहेको क्षेत्रमा लगेर विस्फोट गराएको समाचार संस्था रोयटर्सले जनाएको छ ।
विस्फोट आन्तरिक मामिला मन्त्रालयको भवनलाई लक्षित गरी गराइएको हो । सडकमा हिँडिरहेका मानिस विस्फोटनमा परेका हुन् । तालिबान बिद्रोहीले आक्रमणको जिम्मा लिएको छ ।
यो विस्फोट पछिल्ला केही महिनामा सबै भन्दा घातक विस्फोट हो । गएको हप्ता काबुलमा रहेको सुविधासम्पन्न होटलमा आक्रमण गर्दा २२ जनाको ज्यान गएको थियो ।
स्थानीय समय अनुसार शनिबार बेलुका सवा १२ बजे युरोपियन युनियनको कार्यालय, एक अस्पताल र चिकेन स्ट्रिटको नामले चिनिने व्यापारिक केन्द्र रहेको व्यस्त क्षेत्रमा विस्फोट भएको हो ।
एम्बुलेन्समा आएका आक्रमणकारीले विरामीलाई अस्पताल लैजाने भन्दै कडा सुरक्षा रहेको क्षेत्रमा प्रवेश गरी विस्फोट गराएका हुन् । आक्रमणको संयुक्त राष्ट्रसंघ, अमेरिका, फ्रान्ससहितले विरोध गरेका छन् ।
तस्बिर : इपिए, एएफपी र रोयटर्स
भर्खरै
लोकप्रिय
