काठमाडौं-कैलाली भन्सार कार्यालयले चालू आर्थिक बर्षको ६ महिनामा लक्ष्य भन्दा करिब २ करोड रुपैयाँ बढी राजश्व संकलन गरेको छ।
छ महिनामा १ अर्ब ७८ करोड ४७ लाख रुपैयाँ राजश्व सङ्कलन गर्न लक्ष्य दिइएकोमा कैलाली भन्सार कार्यालय १ अर्ब ८० करोड १४ लाख रुपैयाँ सङ्कलन गर्न सफल भएको हो।
कैलाली भन्सार कार्यालयका सूचना अधिकृत नारायण जोशी कैलाली भन्सार कार्यालयबाट हुने आयातमा वृद्धि हुँदा लक्ष्य भन्दा बढी राजश्व संकलन गर्न सकिएको बताउँछन्।
जोशीले अन्तस शुल्क लाग्ने सामाग्रीहरुको आयातमा गिरावट आउँदा अन्तस् शुल्क अपेक्षा भन्दा निकै कम संकलन भएको जानकारी दिए।
६ महिनामा अन्तस् शुल्कको लक्ष्य २४ करोड ४१ लाख २६ हजार रुपैयाँ दिईएकोमा ५ करोड ६८ लाख ८३ हजार रुपैयाँ मात्रै सङ्कलन भएको छ।
अन्त शुल्क लक्ष्य भन्दा न्यून सङ्कलन हुँदा भन्सार महसुल र मूल्य अभिबृद्धि कर भने लक्ष्य भन्दा बढी संकलन भएको छ।
भन्सार महसुलको लक्ष्य ८३ करोड ३४ लाख ८० हजार रुपैयाँ हुँदा ६ महिनामा ९२ करोड ३० लाख ३८ हजार रुपैयाँ संकलन भएको हो।
यस्तै ७० करोड ७१ लाख ७० हजार रुपैयाँ लक्ष्य दिइएको मूल्य अभिबृद्धि कर ८२ करोड १५ लाख १३ हजार रुपैयाँ संकलन भएको छ।
चालु आर्थिक बर्षमा कैलाली भन्सार कार्यालयलाई ३ अर्ब ८७ करोड ९९ हजार रुपैयाँ राजश्व संकलनको लक्ष्य दिइएको छ।
६ महिनाका लक्ष्यको ४६.४२ प्रतिशत राजश्व संकलन भई सकेको छ।
भर्खरै
लोकप्रिय
