हेटौंडा – राजनीतिक परिवर्तन अनि त्यसपछि भएको चुनावपछि फेरिएको राजनीतिक संरचनाको औपचारिक अभ्यासको सुरुवात बिहीबारदेखि हुँदैछ ।
नयाँ संविधान अनुसार संघीय संरचनामा गएको नेपालको पहिलो संघीय संरचना अन्तर्गतको प्रदेश संसदको बैठक बिहीबार बस्दैछ । सात प्रदेश मध्ये प्रदेश संसदको पहिलो बैठक गर्ने पहिलो प्रदेश प्रदेश ३ बन्दैछ । प्रदेशको अस्थायी राजधानी हेटौंडामा बिहीबार प्रदेश संसदको पहिलो बैठक बस्दैछ ।
प्रदेश नं ३ को प्रदेशसभाको बिहीबार हुने अधिवेशनका लागि कार्यसूचि पनि तयार भएको छ । प्रदेशसभाको पहिलो बैठकका लागि प्रदेशसभाको अन्तरिम कार्यविधि पारित गर्ने र सभामुख चयनको प्रस्ताव पेश गर्ने कार्यसूचि छ । पहिलो बैठकमा सभामुखको भूमिका ज्येष्ठ सदस्य डोरमणि पौडेलले निर्वाह गर्दै छन् । पौडेल ७१ वर्षका छन् ।
बुधबार बेलुका बसेको सर्वदलीय बैठकले पाँचवटा विषयमा कार्यसूचि तयार गर्न सर्वसम्मतीबाट निर्णय गरेको थियो ।
सर्वदलीय निर्णयले प्रदेश प्रमुख अनुराधा कोइरालाले आह्वान गरेको ऐतिहासिक प्रदेशसभाको अधिवेशनसम्बन्धी सूचनाको विवरण प्रदेशसभाका ज्येष्ठ सदस्य डोरमणि पौडेलले प्रस्तुत गरेका छन् ।
प्रदेशसभाको ऐतिहासिक अधिवेशनमा सातवटा दलको तर्फबाट बोल्ने प्रदेशसभा सदस्य र एकजना स्वतन्त्र प्रदेशसभा सदस्यलाई बोल्नेक्रम र समय निर्धारण गर्ने सूचि पनि तयार गरिएको छ ।
प्रदेशसभा सभामुखका लागि यही माघ २९ गते निर्वाचनको मिति तोक्न तयारी पनि छ । प्रदेश नम्बर तीनमा ११० जना प्रदेशसभा सदस्य छन् ।
भर्खरै
लोकप्रिय
